‘Minny'd’?
Myfyrdod sydyn syml yw 'Minny'd'.
Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.
PEDWERYDD SUL Y GRAWYS
Dysg i mi dy ffordd, O Arglwydd (Salm 27:11a)
Taith yw’r Grawys. Taith anodd yw hi - taith hir, dros dir diffaith, caled, cras. Buasai’r fath daith yn amhosibl heb ffynhonnau. O amgylch ffynhonnau’r daith tyf palmwydd, a gwyrddni. Mae yma bopeth sydd angen i’n hadnewyddu ar ein taith - dŵr, cysgod o lygad crasboeth yr haul, a ffrwythau’r palmwydd yn fwyd.
Amhosibl fyddai teithio taith y Grawys heb y llecynnau hyn.
Mae Duw yn gofalu amdanom, ac yn ei hadnewyddu. Hanfod pob gwerddon yw gorffwys ac adnewyddiad.
Os gwyddoch am yr angen am orffwys wedi blinderau’r daith, neu os gwyddoch am rywun sydd heddiw mewn angen am adnewyddiad corff ac enaid, beth am gynnau cannwyll gweddi, a chyflwyno hwy, neu’ch hunain i ofal Duw?
'YMLAEN': Y SUL A'R WYTHNOS NEWYDD
Edrychwn ymlaen at yr Oedfa Foreol Gynnar (11/3 am 9:30 yn y Festri). Dathlwn Sul y Mamau gan ystyried, trwy gyfrwng amrywiol adnodau a delweddau, rhyfedd a ryfeddol gariad ‘Duw cariad yw’. Bydd cyfle i gyfrannu tuag at Fanc Bwyd Caerdydd yn ystod y dydd a bydd brecwast bach a nwyddau Masnach Deg yn y Festri rhwng y ddwy Oedfa Foreol.
Yn yr Oedfa Foreol (10:30) bydd ein Gweinidog yn cyflwyno mam Ichabod (1 Samuel 4:19-22; 6:1 a 7:12), cyn mynd â ni heibio i faen coffa Ebeneser ac ymlaen at fam Immanuel. (Mathew 1:18-24).
Ein braint pnawn Sul (14:30), fel eglwys, fydd cael bod yn gyfrifol am baratoi te i’r digartref yn y Tabernacl, yr Âis.
Liw nos (18:00): Arwyddocâd y ‘Na’ - Diwrnod Rhyngwladol y Merched a hen stori ag iddi neges oesol gyfoes. (Esther 1:1-2:4). Boed bendith ar Oedfaon y Sul.
Bydd ein Diaconiaid yn cwrdd nos Lun. Gofynnwn am arweiniad Duw wrth edrych a threfnu i’r dyfodol.
Cymdeithas Ddiwylliannol Eglwys Minny Street, (13/3; 19:30 yn y Festri): "Eisteddfod yr Arwyddfardd" yng nghwmni Dyfrig Roberts.
Koinônia amser cinio dydd Mercher (14/3): Mae ‘na fwy i bryd o fwyd o gwmpas bwrdd na bodloni’r archwaeth am fwyd. Mae’n gyfle i rannu syniadau, i drafod, i gymdeithasu a dod i nabod ein gilydd yn well. Dyna sy’n digwydd yn y Koinônia misol.
Nos Fercher (14/3; 19:00-20:30) Cwrdd Chwarter Cyfundeb Dwyrain Morgannwg (yng Nghapel y Tabernacl, Pen-y-bont ar Ogwr): Ymweliad Cyfeillion o Gyfundeb Gorllewin Caerfyrddin. (Pwyllgor Gwaith am 18:30).
Babimini bore Gwener (16/3; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.
YN ANAD UN (7) ATEB
Canu Mawl
YN ANAD UN (7)
Pos wythnosol.
Ffordd hawdd a hwyliog i ehangu ein gwybodaeth Feiblaidd.
Gwahanol ac anoddach yr wythnos hon!
Pedair adnod, dau air.
Os yn gywir gennych, gellid ffurfio dau air, un o lythrennau cyntaf, a’r llall o lythrennau olaf y pedwar uchod.
Daw'r ateb am 20:30.
MINNY’D (24): GWNA GYFIAWNDER Â MI.
‘Minny'd’?
Myfyrdod sydyn syml yw 'Minny'd'.
Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.
'BETHANIA': POBL YR HEN DESTAMENT
‘Hanna yn y Deml’ gan Rembrandt (1606-1669)
HANNA
1 Samuel 2: 1-10
Gwelsom y peth o’r blaen ... diflastod rhwng Sarai a Hagar. Y tro hwn, Peninna, mam Elcana’r Effraimiad sydd byth a hefyd yn gwawdio Hanna. ’Roedd Hanna heb blant. Eto, daeth dydd pan anwyd mab i Hanna. Chwerthin gwnaeth Sara, canu mae Hanna, nerth ei llais - cân o orfoledd a diolchgarwch, bwrlwm o fawl. Hanna’n canmol Duw am ei drugaredd, Duw sy’n troi’r byd â’i ben i waered, Duw'r chwyldroadau mawr.
Pa ots prun ai Hanna ei hun a gyfansoddodd y geiriau neu rywun arall, ymhen blynyddoedd, a osododd y geiriau yn ei genau. Mae’r gwirionedd sydd yn y gân wedi aros drwy’r oesau, hyd ein dydd ni.
Do, gwrandawyd ei chwyn, atebwyd ei gweddi, a chyflawnodd hithau ei haddewid. Gyda Samuel yn ddigon hen i fwydo a gwisgo’i hun, aeth Hanna â’r un bach i Seilo at Eli a’i fenthyg i Dduw.
Arferai Hanna o flwyddyn i flwyddyn fynd i weld Samuel. Byddai’n mynd â chot newydd hardd iddo bob tro, bob un fymryn yn fwy na’r olaf. Ychydig a wyddom amdani ar ôl hyn, dim byd mwy nag iddi ddychwelyd gyda Elcana i’w chartref a bod iddynt dri o feibion a dwy o ferched.
- Briw a chur, gwobr ei chariad meddai J.H.Roberts am Mair, mam Iesu; trafoder hyn yng nghyd-destun bywyd a phrofiad Hanna.
- Cymharer gân Hanna ag Emyn Mawl Mair (Luc 1: 46-55).
EIN HOEDFA HWYROL
Diolch i bawb a ddaeth ynghyd i'r Oedfa Foreol.
Penderfynwyd CYNNAL ein Hoedfa Hwyrol (18:00).
Testun homili ein Gweinidog: Gwyn ei byd y genedl y mae yr Arglwydd yn Dduw iddi. (Salm 33:12a)
Glendid; gwaddol a gweinidogaeth fydd tri phen ein myfyrdod.
