TRYDYDD SUL Y GRAWYS

Dysg i mi dy ffordd, O Arglwydd (Salm 27:11a)

Fel hyn y dywed yr ARGLWYDD: Safwch ar y ffyrdd; edrychwch, ac ymofyn am yr hen lwybrau. Ple bynnag y cewch ffordd dda, rhodiwch ynddi, ac fe gewch le i orffwys (6:16)

Diolch i Jeremeia am y geiriau, ac am y cyfarwyddyd.

Oedwn heddiw ac ymofyn am yr hen lwybrau. Gwneud cam â’r ymadrodd yr hen lwybrau yw rhoi’r argraff bod Jeremeia’n rhoi gwerth ar yr hen, dim ond am ei fod yn hen. Na, galw mae’r proffwyd am adfer symledd i grefydd fel yr unig ffordd ymlaen. Symledd yr hen berthynas agos â Duw yn nyddiau’r daith trwy’r anialwch sydd yn ei feddwl - Duw â’i bobl yn cydgerdded.

Nid cynnydd yw colli symlrwydd. Yng nghanol annibendod di-ben-draw ein cyfnod a’n profiad, cynnig symlrwydd bendigedig mae Efengyl Iesu Grist.

Os gwyddoch beth yw ymofyn am yr hen lwybrau. Os gwyddoch am rywun sydd yn heddiw’n sefyll wrth groesffordd mewn bywyd, beth am gynnau cannwyll gweddi, a chyflwyno hwy, neu’ch hunain i ofal Duw?

'YMLAEN': Y SUL A'R WYTHNOS NEWYDD

Daeth yr eira’n drwch i Gaerdydd a’r cyffiniau! Bu’n rhaid gohirio ein cinio Gŵyl Ddewi a ‘Cyngerdd a Chacen’ gwaetha’r modd OND mae’n fwriad gennym i gynnal ein Hoedfa Foreol am 10:30. Gweinyddir y Cymundeb; bydd natur a threfn yr Oedfa yn dibynnu i raddau helaeth ar bwy all ddod ynghyd. Felly, os mae’n ddiogel i chi fentro allan bore Sul, estynnir croeso calon i chi i ymuno â ni yn ein haddoliad. Gwneir penderfyniad parthed yr Oedfa Hwyrol bore Sul.

Nos Lun (5/3; 19:00-20:30) PIMS.

Nos Fawrth (6/3; 19:30-20:30): ‘Bethania’. Echel ein trafodaeth eleni yw ‘Pobl yr Hen Destament’. Parhawn gyda HANNA (1 Samuel 2: 1-10). Darperir nodiadau ‘Bethania’ rhag blaen ar y wefan hon bore dydd Llun.

Cyngor Eglwysi Cymraeg Caerdydd nos Iau (8/3: 19:30): Myfyrdod y Grawys 2 yng Nghanolfan y Conglfaen (Cornerstone), Heol Siarl dan arweiniad Carys Whelan. Gweddïwn am wenau Duw ar waith a chenhadaeth Cyngor Eglwysi Cymraeg Caerdydd.

MINNY’D (23): MEWNFUDWR O FLODYN!

 ‘Minny'd’?

Myfyrdod sydyn syml yw 'Minny'd'.

Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.

PYTHEFNOS MASNACH DEG (Chwefror 26 - Mawrth 11)

... yna caiff barn yn trigo yn yr anialwch a chyfiawnder gartrefu yn y doldir; bydd cyfiawnder yn creu heddwch, a’i effeithiau yn llonyddwch a diogelwch hyd byth. Yna bydd fy mhobl yn trigo mewn bro heddychlon, mewn anheddau diogel a chartrefi tawel. (Eseia 32:16-18)

Mae’r weledigaeth hon yn bell o gael ei gwireddu. Heddiw, yr un peth, yn anad dim, sy’n tarfu ar y gwaith o adeiladu gwell byd yw parodrwydd yr ychydig i ymelwa ar draul y mwyafrif. Mae ein brodyr a chwiorydd, ledled byd yn llafurio o dan amodau gwaith echrydus, a’m dâl cwbl annigonol i sicrhau’r mesur lleiaf o’r diogelwch a moethusrwydd y cymerwn ni yn ganiataol. Mae Duw yn disgwyl i ni godi llais yn erbyn pob anghyfiawnder. Mae Duw yn galw arnom i ddefnyddio’r golud a rhoddwyd i ni i sicrhau gwell byd i bawb.

Gwna cynnyrch Masnach Deg hi’n hawdd i ni newid y byd. Wrth yfed te a choffi Masnach Deg, gallwn newid y byd, fesul paned. Wedi dewis siocled Masnach Deg, gallwn newid y byd trwy fwyta siocled! Mae sgidiau Masnach Deg ar gael. Gallwn newid y byd wrth gerdded; mae pêl-droed Masnach Deg i gael - beth am newid y byd fesul gôl?

Nid chwarae bach yw Masnach Deg. Model economaidd amgen yw Masnach Deg yn seiliedig ar yr argyhoeddiad fod masnach a thegwch yn medru cyd-gerdded a chyd-weithio.

AIL SUL Y GRAWYS

Dysg i mi dy ffordd, O Arglwydd (Salm 27:11a)

Taith yw’r Grawys. Taith anodd yw hi - dros dir diffaith, caled, cras.

Pererin wyf mewn anial dir,

yn crwydro yma a thraw ...

Tyrd, Ysbryd sanctaidd, ledia’r ffordd ...

Diolch i Williams Pantycelyn am y geiriau, ac am y cyfarwyddyd.

Beth sydd mewn anialwch? Dim. Dim ond llwch a llonyddwch llethol. Dim. Neb.

Beth sydd mewn anialwch? Cyfle. Cyfle yng nghanol drysni’r diffeithwch i ganfod Duw. Yng nghanol profiadau chwerw'r anialwch mae Duw gyda ni. Dyma neges y Beibl drwyddo draw.

A wyddoch tybed, am yr anialwch, a’i effaith ar berson?

A wyddoch efallai, am rywun sydd yn heddiw’n cerdded mewn anial dir?

Os felly, beth am gynnau cannwyll gweddi, a chyflwyno hwy, neu’ch hunain i ofal Duw?

'YMLAEN': Y SUL A'R WYTHNOS NEWYDD

Dros y Sul, un adnod, dwy bregeth: Os myn neb ddod ar fy ôl i, rhaid iddo ymwadu ag ef ei hun a chodi ei groes a'm canlyn i (Mathew 16:24). Yn yr Oedfa Foreol (10:30; cynhelir Ysgol Sul), bydd Owain yn bwrw golwg lled gyffredinol dros neges yr adnod gan ymdrin â 'Dewis', 'Disgyblaeth' a 'Dalifyndrwydd' (gellid darllen Mathew 16:13-28 a Luc 14:25-33 rhag blaen). Liw nos (18:00), ceisiwn fynd i’r afael ag arwyddocâd codi croes - ein croes. Boed bendith.

Cymdeithas Ddiwylliannol Eglwys Minny Street, (27/2; 19:30 yn y Festri): "Yr Eglwys yng Nghymru a fy ngwaith fel Archesgob" yng nghwmni Y Gwir Barchedig Ddr Barry Morgan.

Babimini bore Gwener (2/3; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.

Dydd Gweddi Fyd-eang y Chwiorydd (2/3; 14:00): gwasanaeth Cylch Caerdydd, a baratowyd eleni gan Chwiorydd Cristnogol Swrinam ar y thema "Mae cread Duw yn dda iawn i gyd!", yn Eglwys y Crwys.

'BETHANIA' - POBL YR HEN DESTAMENT

RUTH

Ruth 1: 16-18 a 2: 10-13; Eseia 25:4 a Salm 90: 17

Mae Ruth yn un o gymeriadau mwyaf prydferth y Beibl. Ystyr enw Ruth yw ffrind, cyfaill. ’Roedd dyfnder rhyfeddol i’w cyfeillgarwch ac ymgysegriad - ’roedd yn well ganddi fentro i wlad ddieithr, i ganol pobl newydd, derbyn ac addoli Duw gwahanol, wynebu’r tlodi a chaledi anorfod, yn hytrach na mynd yn ôl i’w chynefin at ei theulu, ei phobl a’i ffrindiau. ’Roedd yn well ganddi fod yng nghwmni Naomi doed a ddelo, na byw hebddi. Dim ond y cariad a fu rhwng Dafydd a Jonathan sydd i’w gymharu â’r cariad sydd yn cydio’r ddwy hon wrth ei gilydd.

Yn ôl pob tebyg, cafodd Llyfr Ruth ei ysgrifennu yn yr un cyfnod â Llyfr Jona. Credir hefyd mai’r un pwrpas a diben oedd i’r ddau; pwysleisio y dylai crefydd fod yn ddigon mawr ac yn ddigon cryf i groesawu pobl o genhedloedd eraill. Yn lle bod crefydd yn crebachu meddwl pobl, dylai ledu eu gorwelion. A dyna rôl Boas yn y stori. Y bonheddwr a ofalodd fod Naomi a Ruth yn cael lloffa yn amser y cynhaeaf. O dipyn i beth fe enillodd Ruth galon Boas. Ganwyd iddynt fab, Obed. Trwyddo bendithiwyd y genedl, oherwydd ef oedd tad Jesse, a Jesse oedd tad y Brenin Dafydd.

Mewn ystyr real iawn mae Ruth yn llawn cymaint o arloeswr crefyddol ag yr oedd Abraham. Trodd hwnnw ei gefn ar hen fyd a ffordd o fyw i ddarganfod ffydd newydd. Gadawodd hon ei chynefin, teulu a chydnabod a dewis dod, a bod, yn rhan o deulu Abraham. Mae awdur Llyfr Ruth yn mynegi hynny’n ddistaw bach! Cymharwch alwad Abraham: "Dywedodd yr Arglwydd wrth Abram, "Dos o’th wlad, ac oddi wrth dy dylwyth a’th deulu, i’r wlad a ddangosaf i ti"" (Genesis 12: 1) gyda geiriau Boas wrth Ruth "... fel y gadewaist dy dad a’th fam a’th wlad enedigol, a dod at bobl nad oeddit yn eu hadnabod o’r blaen" (Ruth 2:12). Mae stori Ruth y Foabes yn rhan annatod o hanes holl ddisgynyddion Abraham.

SUL CYNTAF Y GRAWYS

Dysg i mi dy ffordd, O Arglwydd (Salm 27:11a)

Taith yw’r Grawys. Y mae’n bwysig bod ystyr a phwrpas i daith ein Grawys, gan fod crwydro’n ddiamcan yn gwbl ofer, ac yn wastraff ar ein hamser ac ynni. Y mae i bob taith ei nod - ei phen draw. Anelu at gyrraedd y mae’r teithiwr - a’r pen draw sy’n rhoi ystyr a phwrpas i’r teithio. Heddiw, Sul cyntaf y Grawys, ‘rydym megis ar ddechrau’r daith, ac mae Jerwsalem ym mhell, ond fe ddaw yn nes bob wythnos nawr.

Beth am gynnau cannwyll i nodi’r Sul hwn? Neu, efallai bod rhywun ar eich meddwl heddiw. Gellid cynnau cannwyll felly fel arwydd o’ch gofal drostynt; eich balchder ohonynt neu o’ch hiraeth amdanynt.