'BETHANIA' - POBL YR HEN DESTAMENT

RUTH

Ruth 1: 16-18 a 2: 10-13; Eseia 25:4 a Salm 90: 17

Mae Ruth yn un o gymeriadau mwyaf prydferth y Beibl. Ystyr enw Ruth yw ffrind, cyfaill. ’Roedd dyfnder rhyfeddol i’w cyfeillgarwch ac ymgysegriad - ’roedd yn well ganddi fentro i wlad ddieithr, i ganol pobl newydd, derbyn ac addoli Duw gwahanol, wynebu’r tlodi a chaledi anorfod, yn hytrach na mynd yn ôl i’w chynefin at ei theulu, ei phobl a’i ffrindiau. ’Roedd yn well ganddi fod yng nghwmni Naomi doed a ddelo, na byw hebddi. Dim ond y cariad a fu rhwng Dafydd a Jonathan sydd i’w gymharu â’r cariad sydd yn cydio’r ddwy hon wrth ei gilydd.

Yn ôl pob tebyg, cafodd Llyfr Ruth ei ysgrifennu yn yr un cyfnod â Llyfr Jona. Credir hefyd mai’r un pwrpas a diben oedd i’r ddau; pwysleisio y dylai crefydd fod yn ddigon mawr ac yn ddigon cryf i groesawu pobl o genhedloedd eraill. Yn lle bod crefydd yn crebachu meddwl pobl, dylai ledu eu gorwelion. A dyna rôl Boas yn y stori. Y bonheddwr a ofalodd fod Naomi a Ruth yn cael lloffa yn amser y cynhaeaf. O dipyn i beth fe enillodd Ruth galon Boas. Ganwyd iddynt fab, Obed. Trwyddo bendithiwyd y genedl, oherwydd ef oedd tad Jesse, a Jesse oedd tad y Brenin Dafydd.

Mewn ystyr real iawn mae Ruth yn llawn cymaint o arloeswr crefyddol ag yr oedd Abraham. Trodd hwnnw ei gefn ar hen fyd a ffordd o fyw i ddarganfod ffydd newydd. Gadawodd hon ei chynefin, teulu a chydnabod a dewis dod, a bod, yn rhan o deulu Abraham. Mae awdur Llyfr Ruth yn mynegi hynny’n ddistaw bach! Cymharwch alwad Abraham: "Dywedodd yr Arglwydd wrth Abram, "Dos o’th wlad, ac oddi wrth dy dylwyth a’th deulu, i’r wlad a ddangosaf i ti"" (Genesis 12: 1) gyda geiriau Boas wrth Ruth "... fel y gadewaist dy dad a’th fam a’th wlad enedigol, a dod at bobl nad oeddit yn eu hadnabod o’r blaen" (Ruth 2:12). Mae stori Ruth y Foabes yn rhan annatod o hanes holl ddisgynyddion Abraham.

SUL CYNTAF Y GRAWYS

Dysg i mi dy ffordd, O Arglwydd (Salm 27:11a)

Taith yw’r Grawys. Y mae’n bwysig bod ystyr a phwrpas i daith ein Grawys, gan fod crwydro’n ddiamcan yn gwbl ofer, ac yn wastraff ar ein hamser ac ynni. Y mae i bob taith ei nod - ei phen draw. Anelu at gyrraedd y mae’r teithiwr - a’r pen draw sy’n rhoi ystyr a phwrpas i’r teithio. Heddiw, Sul cyntaf y Grawys, ‘rydym megis ar ddechrau’r daith, ac mae Jerwsalem ym mhell, ond fe ddaw yn nes bob wythnos nawr.

Beth am gynnau cannwyll i nodi’r Sul hwn? Neu, efallai bod rhywun ar eich meddwl heddiw. Gellid cynnau cannwyll felly fel arwydd o’ch gofal drostynt; eich balchder ohonynt neu o’ch hiraeth amdanynt.

'YMLAEN': Y SUL A'R WYTHNOS NEWYDD

Dros y Sul, ein braint fel eglwys fydd cael gwrando cenadwri a derbyn arweiniad gan y Parchedig Guto Llywelyn (Rhydaman). Gwyddom y cawn ganddo bregethu meddylgar a phregethau buddiol a bendithlawn. Yn ôl ein harfer, bydd yr Oedfa Foreol am 10:30. Cynhelir yr Ysgol Sul. Bydd yr Oedfa Hwyrol am 18:00. Boed bendith ar y Sul.

Ein braint pnawn Sul (14:30), fel eglwys, fydd cael bod yn gyfrifol am baratoi te i’r digartref yn y Tabernacl, yr Âis.

Bydd y gymdeithas yn parhau yn Koinônia: swper blasus a sgwrs ddifyr mewn bwyty Eidalaidd cyfagos.

Nos Fawrth (20/2; 19:30-20:30): ‘Bethania’. Echel ein trafodaeth eleni yw ‘Pobl yr Hen Destament’. Parhawn gyda RUTH (Ruth 1:16-18 a 2:10-13; Eseia 25:4 a Salm 90:17). Darperir nodiadau ‘Bethania’ rhag blaen ar y wefan hon bore dydd Llun.

Taith Gerdded bore Mercher (21/2; 10:30-13:30). Manylion llawn yng nghyhoeddiadau’r Sul.

Cyngor Eglwysi Cymraeg Caerdydd nos Iau (22/2: 19:30): Myfyrdod y Grawys 1. Yn Festri Minny Street gyda’r Parchedig Aled Huw Thomas yn arwain. Gweddïwn am wenau Duw ar waith a chenhadaeth Cyngor Eglwysi Cymraeg Caerdydd.

YN ANAD UN (6): ATEB

Eseciel 1:1

Mae’r gweddill yn cyfeirio at y ‘trydydd’.

YN ANAD UN (6)

Pos wythnosol.

Ffordd hawdd a hwyliog i ehangu ein gwybodaeth Feiblaidd.

Daw'r ateb am 20:30.

Pa adnod/adnodau NAD sydd yn perthyn i’r gweddill, a pham?

MINNY’D (22): VALENTINE

 ‘Minny'd’?

Myfyrdod sydyn syml yw 'Minny'd'.

Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.

'YMLAEN': Y SUL A'R WYTHNOS NEWYDD

Y Groes Geltaidd fydd canolbwynt ein sylw yn yr Oedfa Foreol Gynnar (9:30). Gwahoddir ni, un ac oll, i’r cylch!

Yn yr Oedfa Foreol (10:30) bydd ein Gweinidog yn gorffen ei gyfres o bregethau ar Wynfydau Efengyl Mathew.
Gwyn eu byd y rhai a erlidir o achos cyfiawnder, oherwydd eiddynt hyw yw teyrnas nefoedd. Gwyn eich byd pan y’ch gwaradwyddant, ac y’ch erlidiant, ac y dywedant bob drygair yn eich erbyn er fy mwyn i, a hwy yn gelwyddog. (Mathew 5:10,11)

Erledigaeth! Dyna y mae’r sawl a ddisgrifiwyd yn y gwynfydau blaenorol i’w ddisgwyl. Onid peth rhyfedd yw llongyfarch person oherwydd ei fod o dan erledigaeth? Trafodir hyn oll yng nghyd-destun Datguddiad 7:9-17.

Gan mai Sul y Gweddnewidiad yw’r Sul hwn, bydd ein Gweinidog, liw nos (18:00) yn ymdrin â chofnod Luc o weddnewidiad Iesu (Luc 9:28-36). Ei destun fydd yr adnod hon: Yr oedd Pedr a’r rhai oedd gydag ef wedi eu llethu gan gwsg, ond deffroesant a gweld ei ogoniant ef ... (Luc 9:32). Mae cwsg ofn, anobaith a difaterwch yn gwasgu, gwasgu. Wedi ein llethu, rhaid deffro - deffro, neu fethu gweld gogoniant ein Harglwydd byw a bendigedig.

Bydd ein Diaconiaid yn cwrdd nos Lun. Gofynnwn am arweiniad Duw wrth edrych a threfnu i’r dyfodol.

Cymdeithas Ddiwylliannol Eglwys Minny Street, (13/2; 19:30 yn y Festri): “Fy Milltir Sgwâr” yng nghwmni Helen Emanuel Huws a John Gilbert Evans.

Koinônia amser cinio dydd Mercher (14/2): Mae ‘na fwy i bryd o fwyd o gwmpas bwrdd na bodloni’r archwaeth am fwyd. Mae’n gyfle i rannu syniadau, i drafod, i gymdeithasu a dod i nabod ein gilydd yn well. Dyna sy’n digwydd yn y Koinônia misol.

Babimini bore Gwener (16/2; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.

YN ANAD UN (5) ATEB

Rhufeiniaid 5:10

Mae’r gweddill yn cyfeirio at ganu.