Mae 2016 wedi ei dynodi yn Flwyddyn y Beibl Byw gan yr enwadau Cymraeg. Y nod yw codi ymwybyddiaeth o’r Beibl ac annog pobl i’w ddarllen a’i drafod.
Heno, cynhaliwyd cyfarfod o Gyngor Eglwysi Cymraeg Caerdydd yng Nghapel 'Bethlehem', Gwaelod y Garth. Arfon Jones oedd yn arwain y noson. Bu Arfon yn sôn am ei waith gydag Ymddiriedolaeth Gobaith i Gymru yn sicrhau i Gymry Cymraeg Air Duw mewn Cymraeg llafar a chwbl ddealladwy. Yn ddiweddar iawn, cyhoeddwyd addasiad tan gamp o’r Beibl: Beibl.net. Dechreuodd Beibl.net. ar-lein fel ymgais i fynegi neges a chyfleu cyfoeth y Testament Newydd trwy gyfrwng Cymraeg sgyrsiol ac anffurfiol. Erbyn 2013 ‘roedd y Beibl cyfan ar gael ar-lein. Mae’r fersiwn print newydd o Beibl.net. yn boblogaidd iawn. Braf, buddiol a bendithiol oedd cael derbyn o arweiniad Arfon heno.
Diolch i bobl 'Bethlehem' am y croeso cynnes arferol. Gweddïwn am wenau Duw ar weinidogaeth Cyngor Eglwysi Cymraeg Caerdydd.
