MEDDWL, TEIMLAD, EWYLLYS

Câr di yr ARGLWYDD dy Dduw â’th holl galon, ac â’th holl enaid, ac â’th holl nerth.

(Deuteronomium 6: 5)

Dyma adnod ein testun mewn gwedd newydd: Câr di yr ARGLWYDD dy Dduw â’th holl FEDDWL, ac â’th holl DEIMLAD, ac â’th holl EWYLLYS.

MEDDWL, TEIMLAD, EWYLLYS, - dyma’r stwff sydd yn gwneud person yn berson, ac mae Duw yn hawlio’r cwbl.

Dyna gyfandir mawr ydyw MEDDWL person. Y mae Duw yn hawlio’r cwbl o’th feddwl. A’th feddwl DI a hawlia Duw - nid meddwl dy dad na’th dadau.

Peth digon peryglus yw TEIMLAD, - stwff anodd iawn i’w drin. Oni chaiff person ddisgyblaeth arno fe dry’n feddalwch sentimental. Pan hawlia Duw dy deimlad fe ddaw’n egni ac yn wasanaeth dros eraill.

'A rhaid i mi wrth dy EWYLLYS', medd Duw: ein gweithredoedd ni; ein bywyd yn ei ddyletswyddau a’i orchwylion. Rhwyddach rhoi meddwl a theimlad i Dduw na rhoi’n hewyllys.

O Ddeuteronomium y codwyd y testun, a dyma’r adnod y gafaelodd Crist ynddi i osod ei hawl ef arnom. (Mathew 22:34-39)

Gofyn mawr, ond Iesu yw’r gofynnwr, ac fe ddyry ef i ni nerth i gyflawni ei ofynion arnom.