Arglwydd trugarog, gweddïwn dros bawb sydd wedi eu goddiweddyd gan drychineb - boed yn drychineb o wneuthuriad dyn neu’n drychineb naturiol.
Gweddïwn
dros bawb sydd wedi colli bywyd a thros y sawl sy’n ymdrechu i arbed bywyd;
dros y rhai sy’n pryderu am y sawl y maent yn eu caru;
dros y rhai sydd ar daith heb sicrwydd ble bydd y daith yn gorffen nac ychwaith a fyddant yn cyrraedd pen y daith.
Arglwydd trugarha wrthynt.
Gweddïwn
dros y sawl sy’n deisyf ‘yr hedd na ŵyr y byd amdano’;
dros bawb sy’n troi atat yng nghanol stormydd bywyd - ar bob cyfandir ac o dan bob math o amgylchiadau.
Arglwydd trugarha wrthynt.
Gweddïwn yn arbennig dros bawb sy’n ffoi neu’n cael eu herlid.
Arglwydd daioni, haelioni a chariad, diolchwn i ti am agor calonnau cynifer o bobl i’r rhai sy’n ffoi am eu bywyd.
Cynorthwya ni yn awr i agor ein breichiau ninnau i gynnal ffoaduriaid sy’n mentro popeth.
Goleua a nertha ni i ddefnyddio’r cyfryngau sydd ar gael i estyn cymorth er mwyn i’r rhai sy’n anobeithio darganfod gobaith newydd ac er mwyn cyfannu ac adfer bywydau sydd wedi cael eu dryllio.
Gofynnwn hyn yn enw Iesu Grist, dy Fab, a fu ei hun yn ffoadur. Amen
