'YMLAEN': Y SUL A'R WYTHNOS NEWYDD

Bore Sul am 10:30, Oedfa Gymundeb.

Homil Bore Sul

Bydd Owain yn dechrau ar gyfres newydd o bregethau: Coed.

Beth yw’r cysylltiad rhwng y duw Eifftaidd Thoth; y brenin Persiaidd Xerxes; Romeo yn glaf o gariad a Sacheus?

Y sycamorwydden yw’r ateb.

Da fuasai darllen rhag blaen Luc 18:35-19:10.

Gan ddychmygu mai chi yw Sacheus, sut buasech yn ymateb o sylweddoli fod Iesu yn dod i’ch tŷ chi?
Yng nghyd-destun hanes Sacheus, trafodwch eiriau Elbert Hubbard (1856-1915): Through sin do men reach the light.

Ystyriwch hefyd yr adnodau hyn:

... mab i Abraham yw’r gŵr hwn yntau. (Luc 19:9)

Gwelodd Duw'r cwbl a wnaeth ac yr oedd yn dda iawn. (Genesis 1:31a)

Cofiwch am Ras 10K (a 2K) Caerdydd bore Sul. Mae’n debyg y bydd taith yr aelodau sydd yn dod o gyfeiriad Llandaf , Treganna a Pontcanna yn cael ei effeithio.

Pregeth Nos Sul

Nos Sul am 18:00, cyfres newydd arall yn dechrau: Hoff Adnodau.

Ein man cychwyn fydd: ... daeth y Gair yn gnawd ... yn llawn gras a gwirionedd. (Ioan 1:14)

Nef a daear, yng Nghrist, ymhlyg yn ei gilydd! Cariad Duw tuag atom, gwaith Duw trosom, nerth Duw ynom ... hyn oll yn gnawd!

Am hynny, nid oes yr un sefyllfa ddynol yn anobeithiol mwyach!

Da fuasai darllen rhag blaen Ioan 1:1-18. Yn weddigar, ystyriwch ‘diffiniad’ Elfed ap Nefydd Roberts o Ras Duw: Cariad achubol Duw yn ein cymodi ag ef ei hun a’r cariad hwnnw yn dod yn eiddo i ni yn Iesu Grist ac yn nerthu, yn ail-greu ac yn cyfeirio bywyd, dyna yw gras.

A bod cyfle, trowch hefyd at Rufeiniad 5:2 - Trwy yr hwn hefyd y cawsom ddyfodfa trwy ffydd i’r gras hwn, yn yr hwn yr ydym yn sefyll ac yn gorfoleddu dan obaith gogoniant Duw; ac Effesiaid 3:20-21: Ond i’r hwn a ddichon wneuthur yn dra rhagorol, y tu hwnt i bob peth yr ydym ni yn eu dymuno, neu yn eu meddwl, yn ôl y nerth sydd yn gweithredu ynom ni. Iddo ef y byddo’r gogoniant yn yr eglwys trwy Grist Iesu, dros yr holl genedlaethau, hyd yn oes oesoedd. Amen.

Bydd ein Diaconiaid yn cwrdd nos Lun. Gofynnwn am arweiniad Duw wrth edrych a threfnu i’r dyfodol.

'YMLAEN' I'R SUL

Bu disgwyl eiddgar am fis Awst.

Hyfryd yw cael y cyfle hwn i gydaddoli a chyd-dystio fel eglwysi Cymraeg y ddinas. Duw a fo’n blaid i ni gyd yn ein gweinidogaeth.

Dros y Sul, yn Ebeneser (10:00; Canolfan yr Eglwys Newydd, Old Church Road a 17:30; Eglwys Canol y Ddinas, URC, Windsor Place) ein braint yw cael cwmni'r Parchedigion Catrin ac Ifan Roberts (Caerdydd).

Gweddïwn am wenau Duw ar y Sul arbennig hwn.

'YMLAEN' I'R SUL

Bu disgwyl eiddgar am fis Awst.

Hyfryd yw cael y cyfle hwn i gydaddoli a chyd-dystio fel eglwysi Cymraeg y ddinas. Duw a fo’n blaid i ni gyd yn ein gweinidogaeth.

Dros y Sul, yn Minny Street (10:30 a 18:00) ein braint yw cael cwmni'r Parchedig Carwyn Sidall (Llanuwchllyn).

Gweddïwn am wenau Duw ar y Sul arbennig hwn.

'YMLAEN' I'R SUL

Bu disgwyl eiddgar am fis Awst.

Hyfryd yw cael y cyfle hwn i gydaddoli a chyd-dystio fel eglwysi Cymraeg y ddinas. Duw a fo’n blaid i ni gyd yn ein gweinidogaeth.　

Dros y Sul, yn y Tabernacl (Yr Ais. 10:30 a 18:00) ein braint yw cael cwmni'r Parchedig Rob Nicholls (Llundain).

Gweddïwn am wenau Duw ar y Sul arbennig hwn.

YMLAEN I'R SUL

Bu disgwyl eiddgar am fis Awst.

Hyfryd yw cael y cyfle hwn i gydaddoli a chyd-dystio fel eglwysi Cymraeg y ddinas. Duw a fo’n blaid i ni gyd yn ein gweinidogaeth.　

Dros y Sul, yn y Crwys (Heol Richmond. 10:30; 18:00 a Chymundeb) ein braint yw cael cwmni'r Parchedig Evan Morgan (Caerdydd).

Gweddïwn am wenau Duw ar y Sul arbennig hwn.

'YMLAEN' I'R SUL

Dros y Sul, ein braint fel eglwys fydd cael gwrando cenadwri a derbyn arweiniad gan y Parchedigion Hywel Davies, Aberdâr (yr Oedfa Foreol am 10:30) a Robin Wyn Samuel (Swyddog Cynnal ac Adnoddau De Cymru, Undeb yr Annibynwyr) yn yr Oedfa Hwyrol am 18:00. Gwyddom y cawn ganddynt bregethu meddylgar a phregethau buddiol a bendithlawn. Gweddïwn am wenau Duw ar Oedfaon y Sul.

Braint eto, pnawn Sul (14:30), fydd cael bod fel eglwys, yn gyfrifol am baratoi te i’r digartref yn y Tabernacl, yr Âis.

'YMLAEN': Y SUL A'R WYTHNOS NEWYDD

Deisyfwn fendith ar Oedfaon y Sul. Bydd ein Hoedfa Foreol (10:30; cynhelir Ysgol Sul.) dan arweiniad Owain: Enoch; ac fe ddaw’r testun o’r bumed bennod o Genesis (ad.22): Rhodiodd Enoch gyda Duw.

‘Roedd Enoch yn dduwiol ei gymeriad. Torrodd blisgyn allanol pethau a gweld Duw ar waith ym mhawb ac ym mhopeth.

‘Roedd Enoch yn ddethol ei gwmni. Dysgodd byw drwy ganfod ystyr i’w fodolaeth yn y byd, trwy feithrin perthynas agos a Duw, ac ymddiried ei hunan i’w arweiniad a’i ymgeledd ef.

‘Roedd Enoch yn ddiogel ei gam. Ymddiriedodd yn Nuw. Nid peth anghyffredin yw inni deimlo digalondid a methiant yn ein bywyd Cristnogol a hynny, yn amlach na pheidio, oherwydd i ni geisio cynnal ein tystiolaeth a’n bywyd ysbrydol gan ddibynnu’n llwyr ar ein hadnoddau a’n nerth ein hunain, ac anghofio addewid Duw o’i gymorth a’i gadernid ef.

Liw nos am 18:00, Stori Joseff! Dyma awdur Genesis ar ei orau! Mae gafael ar y stori hon. Ynddi, ceir popeth sydd angen ar stori dda: nwyd a chwant, cynnwrf mawr a chynllwynio tawel, casineb a chariad, dial a maddeuant.

Un peth sydd ar goll o stori Joseff. Un peth sydd i ti a minnau’n holl bwysig - Duw. Dysgodd Joseff - bu’n rhaid iddo mewn gwirionedd - y grefft o glustfeinio am lais Duw. Dysgodd grefft y buasai’n dda i ni ddysgu ganddo.

Dysgodd Joseff wrando ar fywyd, ei fywyd ei hun, bywyd eraill; fe ddysgodd wrando ar yr holl bethau a ddigwyddodd iddo, o’i gwmpas, ac o’i herwydd. Wrth wrando, fe glywodd Duw yn siarad, yn cyfarwyddo, cynnal, cadw. Ymhen amser, daeth Joseff i fedru clywed Duw ym mhob peth - da a drwg, ac ym mhawb - da a drwg.

Mae’r adnod hon yn crynhôi stori Joseff, ac yn crynhoi Genesis i gyd: ... yr oeddech chwi yn bwriadu drwg ..., ond trodd Duw y bwriad yn ddaioni. (Genesis 50: 19-21). Mae’n adnod syfrdanol o fawr - yn ddatganiad enfawr am ragluniaeth - rhagluniaeth fawr y nef.

Mae Duw wedi ymroi i weithio gyda ni a thrwom ni - a dyna, am wn i, beth yw rhagluniaeth fawr y nef. Mae rhagluniaeth fawr y nef yn debyg iawn i ddawns - dawns hyfryd, hudolus rhwng rhyddid Duw â’n rhyddid ninnau.

Bydd cyfle i gyfrannu nwyddau tuag at Oasis yn ystod y dydd.

Boed bendith.

'YMLAEN': Y SUL A'R WYTHNOS NEWYDD

Edrychwn ymlaen at y Sul nesaf; Sul llawn, ac amrywiol ei fendithion. Bore Sul am 10:30 ein braint fydd cael ymuno yn Oedfa Eglwysi Cyfundeb Dwyrain Morgannwg ym Mynydd Seion, Casnewydd (NP20 1LZ): Y mae’r gair yn agos iawn atom. (Deuteronomium 30:14). Boed bendith.

Bydd ein Hoedfa Hwyrol (18:00) dan arweiniad ein Gweinidog: pregeth olaf y gyfres ‘Newyddion Da'r Pregethwr’. Bydd Owain yn ein harwain i ystyried pwysigrwydd peidio codi temlau dan yr haul. Am wybod rhagor? Dewch â chroeso mawr. (Bydd cyfle i gyfrannu nwyddau tuag at Fanc Bwyd Caerdydd.)

Babimini bore Gwener (19/7; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.