Chwiliwch heddiw am yr angel hwn a'r adnod hon:
GWOBR HEDDWCH NOBEL
10fed o Ragfyr 1901...
Yn Stockholm, y 10fed o Ragfyr 1901 cyflwynwyd y Wobr Heddwch Nobel cyntaf oll. Cwmni dethol ydynt, enillwyr Gwobr Heddwch Nobel: Liu Xiaobo, Wangarri Muta Maathai, Jody Williams, Nelson Mandela, y Dalai Lama, Elie Wiesel; Desmond Tutu, Y Fam Teresa, Anwar Sadat. Gellid lledu’r cylch i gynnwys holl enillwyr holl wobrau gwahanol Nobel - mae bob un ohonynt wedi, ac yn cyfrannu’n fawr i’w gwahanol feysydd.
Cawn wefr o glywed am ddylanwad y bobl hyn, y gwahaniaeth a wnaethpwyd, ac a wneir ganddynt. Mae campau gwleidyddol, diwylliannol, llenyddol, gwyddonol, economaidd y mawrion hyn yn rhyfeddod - maent yn bobl i’w hedmygu’n fawr. Mae’n braf - angenrheidiol wir - cael pobl i’w hedmygu.
Mae gwaith ymchwil Dr Echo Wu o’r Hong Kong Institute of Education yn ceisio amlygu beth yn union yw cyfrinach llwyddiant y rheini a enillodd gwobrau Nobel.
Dengys gwaith ymchwil Dr Wu, a phentwr o ymchwil tebyg, nad anghyffredin y bobl ryfeddol hyn! Pobl debyg i’w cyfoedion ydynt bob un, ar wahân i un peth - fe berthyn i’r enillwyr i gyd y gallu syml i ddal ati i ddal ati nes cyrraedd y nod.
Mae gwaith ymchwil Dr Echo Wu yn codi cwestiynau digon lletchwith, er enghraifft: pe bai ti a fi yn dal ati i ddal ati ychydig yn dynnach, ychydig ym mhellach, ychydig yn hirach, a allem ninnau hefyd wneud llawn cymaint o wahaniaeth mewn cymuned, gwlad a byd?
Daliwn ati i ddal ati i ddal ati felly, ti a fi, nes cyrraedd y nod o well a dedwyddach byd.
(OLlE)
'ANGEL AG ADNOD' ADFENT Y TEULU (12)
Chwiliwch heddiw am yr angel hwn a'r adnod hon:
FFYDD, GOBAITH, CARIAD
Derbyn mae Ffydd. Llaw wag yw Ffydd a estynnir allan gennym i dderbyn gan Dduw. Ein parodrwydd i dderbyn sy’n penderfynu faint a gawn.
Disgwyl mae Gobaith. Byw yn y presennol mae Ffydd; byw yn y dyfodol mae Gobaith. Derbyn gan Dduw mae Ffydd; disgwyl wrtho mae Gobaith.
Rhoi mae Cariad. Derbyn mae Ffydd a Gobaith; rhannu mae Cariad. Casglu’r grawnwin mae Ffydd a Gobaith; ei droi’n win mae Cariad.
'ANGEL AG ADNOD' ADFENT I'R TEULU (11)
Chwiliwch heddiw am yr angel hwn a'r adnod hon:
CWRDD GWEDDI'R ADFENT
Yn y dydd hwnnw fe ddywedir, Wele, dyma ein Duw ni. Buom yn disgwyl amdano i’n gwaredu; dyma’r Arglwydd y buom yn disgwyl amdano, gorfoleddwn a llawenychwn yn ei iachawdwriaeth.
(Eseia 25:9)
Paratowch yn yr anialwch ffordd yr Arglwydd,
unionwch yn y diffeithwch briffordd i’n Duw ni.
(Eseia 40:3)
Yn sŵn y Gair, croesawyd ni i Gwrdd Gweddi’r Adfent. Cyfle i dawel fyfyrio, i ddathlu dyfodiad yr Arglwydd Iesu, gan ddiolch am ystyr ac arwyddocâd ei Adfent ef.
...bwrdd
...tair cannwyll
...cylch o gadeiriau
...tair sedd wag; cadeiriau cadw.
Â’r Gweinidog yn ein harwain yn dawel bwyllog o brofiad yr emynydd i weledigaeth y proffwyd; o weddi i weddïo a chyd-weddïo, daeth y cwmni bychan i weld arwyddocâd y tair sedd wag. ‘Roedd pob un sedd wag yn cynrychioli rhai o gymeriadau’r Adfent. Ioan (Mathew 3:1-6) oedd piau’r sedd wag gyntaf: llais un yn galw yn yr anialwch. Paratowch ffordd yr Arglwydd, unionwch y llwybrau iddo. Yng ngwawl y gannwyll gyntaf, buom yn cofio a diolch am bobl fel Ioan - lleisiau yn yr anialwch - pobl yn ein hannog i ddyheu am gyfiawnder a daioni, i weithredu trugaredd a charedigrwydd; i wrthsefyll yn gadarn pob creulondeb a gormes yn enw, ac er gogoniant ein Harglwydd Iesu.
Eiddo Mair yr ail gadair wag a'r ail gannwyll. Yn ymyl croes Iesu oedd ei fam (Ioan 19:25). Brawddeg drist. Hon wedi ei gario, yn gnawd ei chnawd am naw mis. Hon mewn poen a gwewyr wedi esgor arno. Hon wedi ei fagu a'i feithrin; wedi ei wylio'n tyfu, yn blentyn, yn fachgen, yn ŵr ifanc, yn ddyn. Hon trwy'r cyfan wedi gweddïo a gobeithio, gobeithio a gweddïo. A nawr, yn sefyll wrth droed croes garw, trwy'r dagrau hallt yn gweld y bywyd yn llifo'n goch ohono. Yn ymyl croes Iesu oedd ei fam. Perthyn i Mair deyrngarwch cadarn di-droi’n-ôl. Y teyrngarwch hwn yw her ac esiampl Mair i ni. Boed ffyddlondeb a theyrngarwch yn ein gwasanaeth; ymlyniad a gwres yn ein cariad; dyfalbarhad a menter yn ein penderfyniad i ddilyn Iesu.
Y gadair a'r gannwyll olaf? Iesu - goleuni’r byd (Eseia 60: 1- 3/ Ioan 8: 12). Diolch am oleuni anniffodd Iesu. Plant y goleuni ydym, plant y dydd. Boed i’r goleuni hwn gysuro bob un sydd mewn tristwch, afiechyd, unigrwydd a gofid.
Angenrheidiol yw ymollwng ar dro i dawelwch gweddi a chymorth cyd-weddïo. Ymlonyddu yn nhangnefedd Duw a chwmni’n gilydd. Diolch am Gwrdd Gweddi.
'ANGEL AG ADNOD' ADFENT I'R TEULU (10)
Chwiliwch heddiw am yr angel hwn a'r adnod hon:
TIBERIAS
Ar ôl hyn, amlygodd Iesu ei hun unwaith eto i’w ddisgyblion, ar lan Môr Tiberias...‘Dewch,’ meddai Iesu wrthynt, cymerwch frecwast.’...a chymerodd y bara a’i roi iddynt, a’r pysgod yr un modd. (Ioan 21:1,12,13)
Llun: Itay Bav-Lev
Pedwar ohonom yn dechrau’r dydd mewn defosiwn, myfyrdod a gweddi.
Ers dechrau mis Medi, buom yn dawel ystyried gweddïau’r Beibl. Yn y ‘Tiberias’ cyntaf (14/9) gweddi Abraham (Genesis 18:23-33) oedd testun ein sylw; gweddi Hanna (1 Samuel 1:9-18, 24-28) yn yr ail gyfarfod (12/10); gweddi Solomon (1 Brenhinoedd 3:3-15; 16/11). Echel ein myfyrdod heddiw, oedd gweddi Heseceia (2 Brenhinoedd 19:8-19).
Mewn cyfnodau anodd, boed personol neu genedlaethol mae gweddi Heseceia yn batrwm. ‘Roedd y gelyn yn prysur agosáu: yr Asyriaid. Gelyn o ddifrif, systematig; gelyn dychrynllyd o effeithiol wrth oresgyn, torri ac alltudio. Trodd Heseceia at Dduw. Gwyddai’n iawn fod y sefyllfa’n ddrwg; roedd gobeithion brau ar chwâl. Rhoddodd Heseceia ei ffydd yn Nuw, a chyflwyno’i angen iddo, ac ‘roedd yn ceisio rhoi’r cwbl oddi fewn i ffrâm ewyllys Duw: Yn awr, O! ARGLWYDD ein Duw, gwared ni o’i afael ac yna caiff holl deyrnasoedd y ddaear wybod mai ti yn unig, O! ARGLWYDD, sydd Dduw. (19:19)
Awgrymodd y Gweinidog fod ymddygiad Heseceia’n batrwm i’r Cristion. Rhoddodd y brenin ei ffydd yn Nuw, a mynegodd ei angen mewn gweddi. Onid dyna’n syml yw diben pob oedfa a chwrdd gweddi: ceisio Duw, ymddiried yn Nuw, deisyf gan Dduw cysur a chymorth i fyw?
Dywed awdur Brenhinoedd II i Heseceia dderbyn y neges gan y negeswyr, ac yna mynd i fyny i’r Deml, ac yno iddo...yng nghyfieithiad William Morgan gawn yr ymadrodd hyfryd: lledu y llythyrau gerbron Duw (19:14). Hynny yw, ystyried y sefyllfa yng ngoleuni presenoldeb Duw. Dyna’n union a wnaethom y bore heddiw: lledu llythyrau ein byw gerbron Duw, gan ddeisyf arweiniad, nerth, cynhaliaeth a chyngor.
Buddiol eto bu ‘Tiberias’. Cawsom egwyl fach a’r ddechrau’r dydd i bwyllo, ymdawelu ac i ogwyddo ein meddwl at Dduw.
