Mewn llawer dull a llawer modd y llefarodd Duw gynt wrth y tadau yn y proffwydi, ond yn y dyddiau olaf hyn llefarodd wrthym ni mewn Mab (Hebreaid 1:1).
Gludwaith Simon Holly: 'Monroe'; 2005
Heddiw, yn 1926, ganed Marilyn Monroe. Mae gan Simon Holly (gan. 1979) bortread gwych o Monroe - seren y sgrin - Monroe yn anterth ei hapêl a phoblogrwydd. O fynd yn agos at y llun mawr hwn, daw’n amlwg nad un llun sydd mewn gwirionedd, ond trwch o luniau bach, yn creu un llun mawr. Mynegir gwirionedd pwysig gan Holly am Monroe - tu ôl i’r ddelwedd fawr mae eiddilwch ac amrywiaeth personoliaeth Marilyn. Gellir benthyg y ddelwedd hon am bob un ohonom, ac am Iesu. O bell gwelir dim ond y ddelwedd, y darlun traddodiadol anemig a llipa, ond ... wrth fentro’n nes gwelwn amrywiaeth syfrdanol yr hyn oll yw Iesu i’w bobl ym mhob cwr a chornel o’r byd.
"Iesu, nid oes terfyn arnat." Amen
(William Williams 1717-91; C.Ff: 321)
(OLlE)
