Gweddi Paul dros bobl Dduw yn Effesus (Effesiaid 1:15-23) fu’n arwain ein gweddi, ac yn cynnal ein gweddïau heno.
Mae Paul yn diolch am ffydd ei frodyr a chwiorydd yng Nghrist yn Effesus, ac am y cariad gofalus sydd ganddynt tuag at ei gilydd. Gweddïa ar iddynt gael eu goleuo gan yr Ysbryd sy’n rhoi doethineb a datguddiad (1:17b), a hefyd eu grymuso gan y gallu sydd ganddo o’n plaid ni sy’n credu (1:19b).
Mae’n debyg fod Paul, yn bedwaredd adnod a’r bymtheg a’r ugeinfed adnod, yn defnyddio pedwar gair gwahanol am nerth: ...a’ch dwyn i wybod...beth yw aruthrol fawredd y gallu (dunamis) sydd ganddo o’n plaid ni sy’n credu, y grymuster hwnnw (energeia) a gyflawnodd yng ngrym (kratos) ei nerth (ischus) yng Nghrist, pan gyfododd ef oddi wrth y meirw...
Pentwr o eiriau yn amlygu ymdrech Paul i fynegi rhywbeth o fawredd anhygoel Duw o’n plaid ni sy’n credu.
...dunamis.
...energeia.
...kratos.
...ischus.
A’r ddechrau tymor newydd o wasanaeth, bu cwmni bychan ohonom yn gweddïo
...am y nerth hwnnw - dunamis - sy’n chwythu’n gyrbibion yr holl furiau a saif rhyngom â’n gilydd fel pobl ffydd, a rhyngom â’r byd y gelwir arnom i wasanaethu mewn ffydd, gobaith a chariad.
...am energeia a’r gallu i lawenhau gyda’r rhai sy’n llawenhau, ac wylo gyda’r rhai sy’n wylo. Energeia sydd yn creu, cynnal a chadw ein Koinônia.
...am fuddugoliaeth kratos; beth bynnag ddaw eleni...gyda kratos, yn y pethau hyn i gyd, byddwn yn ennill, eto fyth, buddugoliaeth lwyr trwy’r hwn a’n carodd ni (Rhufeiniaid 8:37).
Ni allwn fyw heb ischus Duw. Ofer ein holl ymdrechion heb ei nerth (ischus) yng Nghrist, pan gyfododd ef oddi wrth y meirw...
Aethom adref yn sŵn geiriau William Williams, (1717-91; CFf. 294):
Does gennyf ond dy allu Mawr
I’m nerthu i fynd ymlaen;
Dy iachawdwriaeth yw fy ngrym
A’m concwest i, a’m cân.
