'Capernaum'?
Pan aeth hi’n hwyr, aeth ei ddisgyblion i lawr at y môr, ac i mewn i gwch, a dechrau croesi’r môr i Gapernaum (Ioan 6: 16,17).
'Capernaum'?
Hanner awr, ar derfyn dydd; defosiwn, gweddi, llonyddwch a myfyrdod. Echel y cyfan heno oedd: ... yr oedd Pedr dan warchodaeth yn y carchar. Ond yr oedd yr eglwys yn gweddïo’n daer ar Dduw ar ei ran (Actau 12:5 BCN).
Dengys profiad Pedr yn y carchar mor rymus yw gweddi pobl Dduw - cafodd ei ryddhau’n wyrthiol wedi deisyfiadau taer yr Eglwys drosto. ‘Roedd ef ei hun yn methu, ond cadwodd ei ffydd ddi-sigl yn Nuw, a’i ymddiriedaeth ddiysgog ym mhobl Dduw, ac o’r herwydd daeth angel i’w gynorthwyo ac agorwyd y drysau. Ar y dechrau credodd mai breuddwyd oedd y cwbl, nes iddo gerdded yng nghwmni’r angel ar hyd y stryd, a hwnnw wedyn yn ei adael yn sydyn wrtho’i hun. Yna sylweddolodd Pedr fod y peth yn real; ei ryddhad yn real - i Dduw ei waredu o law Herod mewn atebiad i’w weddi bersonol a gweddïau’r Eglwys ar ei ran. Dengys profiad Pedr yn y carchar fod ateb i weddi.
Ateb i weddi ... Onid oes amodau i’r ateb a gawn i’n gweddi a gweddïau? Rhaid i’r gweddïwr fod yn unplyg a gonest yn ei weddi, ac yn ei ymdrechion i fod â rhan yn yr ateb a geisiai. Thomas More (1478-1535) fynegodd orau y gwirionedd hwn am weddi, a hynny trwy gyfrwng gweddi: These things, good Lord, that we pray for, give us Thy grace to labour for. Gofynnir cydweithio â Duw.
Ac weithiau, cystal cydnabod, ni roddir ateb bob amser nôl ein dymuniad. Er i Paul ddioddef i swmbwl yn y cnawd, ni chafodd wared ohono, ond daeth nerth digonol iddo trwy gymorth Duw: Digon i ti fy ngras i ... (2 Corinthiaid 12:9a). Defnyddia Duw gyfryngau a gweision lawer (ac ar adegau annisgwyl) i ateb ein gweddïau. Fel Pedr a’r Eglwys dylem weddïo ddyfal trosom ein hunain, a gweddïo’n ddygn tros ein gilydd. Ys dywed Tennyson (Alfred, Lord Tennyson (1809-1892): More things are wrought by prayer than this world dreams of.
Diolch am Gapernaum. Diolch am gylch o gwmni a gweddi. Da a buddiol ein cyfarfod.
