Cynhelir ein Hoedfa Foreol am 10:30. Dewch â chroeso. Byddwn yn ystyried rhywfaint o arwyddocâd goddefgarwch (Salm 34:13,14). Cais heddwch a’i ddilyn yw anogaeth y Salmydd, a hynny, awgryma Owain, yn gyntaf trwy gydnabod argyhoeddiadau. Ond nid digon hynny, rhaid hefyd cydnabod gwahanol argyhoeddiadau. Amhosibl hyn oll heb gydnabod agwedd Crist at bobl.

Bydd cyfle i gyfrannu nwyddau tuag at Oasis yn ystod y dydd a bydd cyfle hefyd i gyfrannu tuag at waith y Genhadaeth yn ystod oedfaon y dydd.

Byddwn fel eglwys yn gyfrifol am baratoi a gweini te i’r digartref yn y Tabernacl prynhawn Sul am 14:30.

Liw nos (18:00) yn yr Oedfa Hwyrol, testun ein sylw fel cynulleidfa fydd testun y drafodaeth yn Llynyddwch bore Gwener: Dameg y Samariad Trugarog (Luc 10:25-37). Awn i’r afael â’r ddameg bob yn dipyn, adnod wrth adnod bron iawn.

Methu dod i’r Oedfaon? Ymunwch â ni trwy gyfrwng negeseuon trydar @MinnyStreet #AddolwnEf Dechrau toc wedi 10:30/18:00.Am wybod mwy? Dewch â chroeso. Boed bendith.

Bydd y gymdeithas yn parhau yn Koinônia: swper blasus a sgwrs ddifyr mewn bwyty Eidalaidd cyfagos.

PIMS nos Lun (19/11; 19:00-20:30 yn y Festri): Ych! Y Nadolig!

Nos Fawrth (20/11; 19:30-20:30): ‘Bethania’. Echel ein trafodaeth eleni yw ‘Ruth ac Esther’. Trown at y bennod olaf o Lyfr Ruth. Darperir nodiadau ‘Bethania’ rhag blaen ar y wefan hon bore dydd Llun.

Bore Gwener (23/11; 10:00): ‘Llynyddwch’. Paned a thrafodaeth wrth ymyl llyn llonydd y Rhath. Cawn gyfle i drafod, fesul pennod, llyfr Elfed ap Nefydd Roberts: Dehongli’r Damhegion (Cyhoeddiadau’r Gair, 2008). Echel ein trafodaeth fore Gwener fydd Y Samariad Trugarog (t.57-61).