… ffydd yn gweithio trwy gariad (Galatiaid 5:6 WM).
Cysylltir tri gair holl bwysig - Ffydd, Cariad a Gwaith. ... ffydd yn gweithio trwy gariad. Gwaith, Cariad a Ffydd: tri pheth a fu’n allweddol bwysig ym mywyd pobl Dduw erioed.
Meddyliwch, er enghraifft am Isaac yn yr adnod hon: Felly adeiladodd yno allor, a galw ar enw’r ARGLWYDD; cododd ei babell yno, a chloddiodd gweision Isaac ffynnon yno … (Genesis 26:25 BCN).
Rhoi datganiad o’i ffydd oedd Isaac wrth godi allor, a galw ar enw’r ARGLWYDD. Wrth osod pabell mae Isaac yn pwysleisio gwerth y ‘garreg aelwyd’ a chwlwm cariad; a gwaith oedd cloddio pydew neu ffynnon - ‘roedd dŵr yn amod elfennol bodolaeth.
Campwaith Isaac oedd dangos inni'r tri pheth sydd yn allweddol bwysig i fywyd cyflawn - Ffydd, Cariad a Gwaith.
Sylwch mai’r allor - ffydd - gafodd y sylw cyntaf. Ail bethau oedd pabell a ffynnon mewn cymhariaeth. Nid ychwanegiad at ei fywyd oedd ei grefydd, ond sylfaen ei fywyd. Roedd Isaac wedi cael ei flaenoriaethau’n iawn.
Ymhellach, gofalodd Isaac osod y tri yn ymyl ei gilydd. Dyna ergyd yr yno a ddigwydd deirgwaith.
… adeiladodd yno allor, a galw ar enw’r ARGLWYDD; cododd ei babell yno, a chloddiodd gweision Isaac ffynnon yno …
Dim o daith oedd o’r allor i’r babell ac o’r babell i’r pydew! Fe ddiogelwyd ei gartref a’i waith am fod cysgod ei grefydd drostynt ill dau. Diffodd a wna tân ein haelwydydd, a’n gweithgarwch a phrysurdeb oni chyneuwn hwynt â thân yr allor.
... ffydd yn gweithio trwy gariad (Galatiaid 5:6 WM).
Ffydd: llawforwyn y llifeiriant.
(OLlE)
