• Y diweddaraf
  • Hafan
  • Amdanom
  • Dyddiadur
  • Yr Ifanc
  • Cysylltu
Menu

Eglwys Minny St.

Street Address
City, State, Zip
Phone Number

Your Custom Text Here

Eglwys Minny St.

  • Y diweddaraf
  • Hafan
  • Amdanom
  • Dyddiadur
  • Yr Ifanc
  • Cysylltu

POS PRYNHAWN GWENER

January 22, 2016 Owain Evans

Beth yw’r ddolen gyswllt rhwng y geiriau isod a’i gilydd, ac â Eseia 6:1-8?

Daw’r ateb yfory.

Yn y cyfamser, mae croeso i chi gynnig ateb trwy gyfrwng dudalen 'CYSYLLTU' y wefan hon, neu @MinnyStreet

Tydi a wnaeth y wyrth, O! Grist, Fab Duw,

tydi a roddaist imi flas ar fyw...

(W. Rhys Nicholas, 1914-96)

Mi welaf le mewn marwol glwy',

i'r euog guddio 'i ben...

(William Edwards, 1773-1853)

Mae peraroglau gras

yn taenu o gylch i maes

awelon hedd…

(William Williams, 1717-91)

O! llefara addfwyn Iesu,

Mae dy eiriau fel y gwin…

(William Williams, 1717-91)

'R wy'n teimlo f'enaid 'n awr yn caru

yr Oen ogwyddodd droso'i ben…

(Morgan Rhys, 1716-79)

CREDYD

January 21, 2016 Owain Evans

Canol mis Ionawr mae holl wariant y Nadolig a’r sêls yn ein goddiweddyd: daw bil y cerdyn credyd.

Gair bach rhyfedd yw Credit? Gair llyfn, melfedaidd yn awgrymu rhywbeth am ddim; anrheg, gwobr. Mae’r melfed yn cuddio dwrn o ddur: y gwrthwyneb sydd wir - debit yw credit; dyled ydyw.

Mae Credit yn caniatáu i berson feddwl fod ganddo’r awenau’n ddiogel yn ei ddwylo. Gall darn bach tenau o blastig ein galluogi i bontio’r gagendor rhwng eisiau rhywbeth a chael y peth hwnnw. Mae Credit yn awgrymu rhyddid, ond rhyddid heddiw yw caethiwed yfory. Nid oes dianc rhag y bil.

Mae dyled yn realiti i’r mwyafrif o ohonom, yn gaethiwed llethol i rai, yn fusnes i eraill. Erbyn diwedd Tachwedd 2015, ‘roedd dyledion pobl Cymru, Lloegr a’r Alban gyda'i gilydd wedi cyrraedd bron i £1.458 triliwn. Ar gyfartaledd mae pob aelwyd felly mewn dyled - gan gynnwys morgeisi - o £54,000. (Ffynhonnell: moneycharity.org.uk)

Eithriadau yw’r rheini nad ydynt mewn dyled o ryw fath. Dyled yw morgais wedi’r cyfan, ac mae’r ddyled honno’n yn ein dal yn dynn am flynyddoedd lawer. Mae ein breuddwydion am wneud rhywbeth gwahanol â’n bywyd wedi eu claddu mewn bricks a mortar. Rhaid gweithio oriau hir i sicrhau fod gennym ddigon o arian i dalu’r morgais, i dalu’n dyledion, i gynnal safon byw. Yn llythrennol felly, gweision cyflog ydym. ‘Does dim rhyfedd fod y Beibl yn ystyried dyled fel y caethiwed creulonaf oll (Deuteronomium 15:1-2).

Mae’r rhwystredigaeth, gwrthdaro, medd-dod a dibyniaeth gynyddol ar anti-depressants sydd mor nodweddiadol o’n cyfnod, yn arwydd efallai o’r ffaith ein bod ni’n gwingo’n reddfol yn erbyn ein cadwynau, a bod ynom awydd dwfn a dwys i gael bod yr hyn y bwriadwyd ni i fod: yn rhydd.

(OLlE)

WYTHNOS WEDDI AM UNDOD CRISTNOGOL: '...R-E-S-P-E-C-T!'

January 20, 2016 Owain Evans

Myfi yw’r ffordd... (Ioan 14:6a) Dyma eiriau Iesu wrth Thomas. Mae adnod yn yr Efengyl yn ôl Thomas: Dywedodd Iesu: Myfi yw Pont y Bywyd.

Mae angen pont yn ogystal â ffordd. Un o bennaf anghenion ein cyfnod yw pontydd diogel: pontydd rhwng cenhedloedd, hiliau, cenedlaethau. Â ninnau yng nghanol Wythnos o Weddi am Undod Cristnogol cydnabyddwn yr angen am bontydd diogel rhwng eglwysi a thraddodiadau Cristnogol. Er mor anodd yw codi’r pontydd hyn, anos eu cynnal a’u cadw. Gall Aretha Franklin ein harwain at yr un peth sydd angen i gadw, cynnal a chodi’r pontydd angenrheidiol hyn: all I’m askin honey is a little R-E-S-P-E-C-T!

Gorchfygol gariad Iesu gwiw,

holl wasanaethwyr teyrnas Dduw

a uno yn un teulu byw:

gan wneud d'ewyllys awn ymlaen

i newydd dasg â newydd dân:

boed d'Eglwys yn un teulu glân. Amen

G.K.A.Bell, 1883-1958 cyf. D.Eirwyn Morgan, 1918-82 (CFf.:351)

 

(OLlE)

 

CYMDEITHAS DDIWYLLIANNOL EGLWYS MINNY STREET

January 19, 2016 Owain Evans

Robin goch ar ben y rhiniog

yn gofyn tamaid heb 'run geiniog,

ac yn dywedyd yn ysmala

O! mae'n oer, fe ddaw eira.

(Hen Bennill)

I'm clyw death murmur dyfroedd

dros gerrig llyfnion gwyn,

a gwelwn foncyff deiliog

yn plygu dros y llyn;

a bachgen bochgoch, troednoeth,

yn sefyll ger y lli

gan syllu a rhyfeddu

at wyrth dy degwch di.

Pioden y Dŵr neu 'Glas y Dorlan' (I. D. Hooson)

Y dryw bach, crëwyd ei ran - i'w osod

yn isel i hedfan;

o waith gwych ceir nyth y gwan

o'r golwg dan ryw geulan.

(Cerddi Cerngoch)

Heno yn y Gymdeithas: Stori Garu. Hanes Daniel Jenkins Jones (RSPB) yn gwylio a gwarchod ein hadar mân. Diolch iddo am noson ddifyr, ac ymhlyg yn y difyrrwch ambell her i warchod rhyfeddod byd natur.

 

 

WYTHNOS WEDDI AM UNDOD CRISTNOGOL Ionawr 18-25

January 18, 2016 Owain Evans
Undod Cristnogol...

Undod Cristnogol...

Mae Undod - hynny yw bod fel un - yn parchu’r pethau sy’n gwahaniaethu’r amrywiol draddodiadau Cristnogol oddi wrth ei gilydd, tra bod Undeb - wedi uno, wedi ymffurfio’n un - yn ceisio dileu’r gwahaniaethu’r amrywiol rheini, a chreu o’r amrywiaeth, unffurfiaeth.

Undeb Cristnogol...

Undeb Cristnogol...

Mae Undod Cristnogol yn debyg i farddoniaeth, rhyddiaith yw Undeb Cristnogol. Peth ysbrydol yw Undod, peth crefyddol, strwythurol, cyfundrefnol yw Undeb. Gellid cael Undod heb Undeb, ac nid yw Undeb yn warant o Undod. Meddyliwch am y peth yn nhermau’r gwahaniaeth rhwng Cariad - Undod; a Phriodas - Undeb. Mae perthynas rhwng y naill a’r llall wrth gwrs, ond nid yr un peth mohonynt. Emosiwn yw Cariad, Sefydliad yw Priodas.

Neu...meddyliwch am weithio englyn. Mater o amynedd, ac ymarfer yw gweithio englyn. Gosod geiriau mewn rhyw drefn arbennig yw gweithio englyn, dim byd mwy na hynny; dyma Undeb - gosod pethau ein ffydd mewn rhyw drefn arbennig. Ond sut mae trawsnewid y geiriau oer yn rhywbeth byw, hardd; yn farddoniaeth? Yr ‘Awen’ sydd eisiau! Dyma Undod. Gwaith cymharol hawdd yw creu a chynnal Undeb Cristnogol. Gellid creu Undeb Cristnogol heb fod rhaid gwahodd Duw i’r pwyllgor. Peth cwbl wahanol yw Undod Cristnogol. Gwaith Duw yw Undod Cristnogol, a ninnau’n cael y fraint aruchel o fod â rhan a chyfran yn y fenter anferthol honno. Boed i’r wythnos hon fod yn gyfle I ni ymroi i gadw, â rhwymyn tangnefedd yr undod y mae’r Ysbryd yn ei roi (Effesiaid 4: 3).

 

(OLlE)

 

 

NEWYDDION Y SUL

January 17, 2016 Owain Evans
Beth sydd yn y bocs?

Beth sydd yn y bocs?

Bocs…

Bocs oedd gan y Gweinidog i ddangos i’r plant heddiw; bocs ag ynddo … rhywbeth byw! ‘Roedd angen gofal ar y peth byw hwn - hen ydyw: 28 mlwydd oed! Cofier, mae’r pethau hyn yn byw’n hen iawn iawn. ‘Roedd y bychain yn awchu i gael gweld y peth byw hwn! Mae sawl un o rain adref gyda’r Gweinidog meddai. Mae rhai yn goch, neu wyn; gwyrdd, brown neu ddu. ’Roedd y plant ar binnau eisiau cael gweld beth oedd yn y bocs, ond ‘roedd gan y Gweinidog rhagor eto i ddweud! ‘Roedd yn gwario tipyn o amser gyda’r peth byw hwn. ‘Roedd yn gymorth mawr mewn bywyd. Ychwanegodd fod llawer iawn o waith ynghlwm wrth y beth byw hwn yn y bocs. O’r diwedd, o’r hir ddiwedd, daeth cyfle i’r bychain, a oedd bellach wedi ymgasglu o gwmpas y Gweinidog a’r bocs ar fwrdd y Sedd Fawr. Ond, na... rhaid oedd ychwanegu un peth: ‘roedd y peth byw yn y bocs yn gallu bod yn beryglus. ‘Roedd ambell un heb fod mor siŵr erbyn hyn os oeddent am gael gweld beth oedd ym mocs y Gweinidog! Cystal cydnabod bod ambell un o’r rhieni hefyd braidd yn ofidus bellach! Agorwyd y bocs. Gwellt a phapur, a’r Gweinidog yn twrio, chwilio a dod o hyd i’r peth byw yng nghudd yn y bocs! Ei godi’n ofalus a’i ddangos i’r plant a phlantos: Beibl! Beibl!? Mae’r Beibl yn fyw mynnai’r Gweinidog. Mae’r Beibl yn fyw, gan fod pob llyfr sydd ynddo yn sôn am Dduw byw. Awgrymodd y Gweinidog fod y Beibl mor berthnasol nawr ag ydoedd pan oedd Owain Llyr yr un oed â Jac, sydd yn 5 oed! A phan fydd Daisy (9 oed) yr un oedran a’r Gweinidog (47 er gwybodaeth!) bydd y Beibl eto, mor berthnasol ag erioed. Mae’r Beibl yn fyw, ac yn dysgu ni sut i fyw.

Y peth byw! Beibl!

Y peth byw! Beibl!

Bu Daisy â'i llaw i fyny'n gwrtais am ychydig. 'Roedd ganddi gwestiwn: 'Pam 'roedd Owain wedi dweud fod y Beibl yn beryglus?' Chwip o gwestiwn da! Esboniodd y Gweinidog fod y Beibl yn beryglus oherwydd bod y llyfr hwn yn herio ein ffordd o fyw; ein ffordd o ymwneud â'n gilydd fel pobl, ac â Duw.

Awena a Bethan oedd yn arwain defosiwn yr ifanc heddiw, ac â ninnau fel eglwys yn profi colledion mawr y cyfnod hwn, buddiol oedd clywed darlleniad llawn cysur a chymorth o Ddatguddiad Ioan, yn gorffen: Bydd yn sychu pob deigryn o’u llygaid nhw. Fydd dim marwolaeth a hyn ymlaen, dim galaru, dim wylo, dim poen. Mae pethau fel roedden nhw wedi mynd (Datguddiad 21:4 Beibl.net). Benthycwyd geiriau John Roderick Rees (CFf.:87) gan Bethan yn weddi; dyma ychydig gymalau o’r ail bennill:

...a hithau'n ddyfnder gaeaf

disgwyliwn wanwyn Crist

a chlywed llais y durtur

uwch pob wylofain trist.

Aeth y plant at ei gwersi. ‘Roedd y gwersi rheini’n barhad o neges y Gweinidog heddiw. Fel rhan o’r amrywiol weithgareddau, gosodwyd trwch o wahanol fathau o lyfrau ar lawr y festri - llyfrau stori, llyfrau hapus-liwgar, llyfrau llwyd-diflas; barddoniaeth; nofelau; llyfrau coginio a llyfrau teithio. Trafodwyd gyda’r plant pa lyfrau y maen nhw’n eu hoffi orau, ac o ble maen nhw’n cael llyfrau. Siop? Ie, a llyfrgell wrth gwrs. Esboniwyd i’r plant nad llyfr mo’r Beibl ond llyfrgell - llond silff o lyfrau o fewn un clawr! Y cwbl yn un gyfrol, yn hanes a storïau, barddoniaeth, chwedlau, llythyrau, proffwydoliaethau a doethineb. Aethpwyd ati i wneud brechdan jam! Rhoddwyd i’r bychain, restr o gyfarwyddiadau. Canlyniad dilyn y cyfarwyddiadau buasai brechdan jam, hyfryd. Hyn oll i ddangos fod y Beibl y cynnig cyfarwyddyd i’n byw a’n bod; cyfarwyddiadau sydd, o’u dilyn, yn gymorth i agosáu at Dduw ac at ein gilydd fel pobl. Yn Ysgol Sul y bobl ifanc, trafodwyd Gweddi’r Arglwydd, gan osod y Weddi Fawr yng nghyfieithiad William Morgan ochr yn ochr â Beibl.net. Buddiol a da bu’r drafodaeth: Er mor gyfarwydd Deled dy deyrnas (Mathew 6:10a WM) ‘roedd y dosbarth yn lled gytûn mae eglurach o dipyn oedd: Dŷn ni eisiau i ti ddod i deyrnasu, ac i’r cwbl sy’n dda yn dy olwg di ddigwydd yma ar y ddaear fel mae’n digwydd yn y nefoedd (Mathew 6:10 Beibl.net). Ond, gwell ganddynt Sancteiddier dy enw (6:9b WM) na dŷn ni eisiau i dy enw gael ei anrhydeddu (6:9b Beibl.net) Pam? Gellid anrhydeddu pobl, ond haedda enw Duw fwy nag anrhydedd - gan mai sanctaidd ydyw, rhaid i ni sancteiddio’i Enw mewn gweddi a gwasanaeth.

Yn y capel, parhau a wnaethom i ystyried y Beibl. Nid pregeth a gawsom heddiw'r bore, ond dwy homili. Yn y cyntaf pwysleisiwyd yr angen i ddarllen y Beibl o ddifri, ac i fod o ddifri wrth ddarllen y Beibl. Magu chwilfrydedd Beiblaidd yn ein heglwysi yw’r gwaith pwysicaf y gelwir arnom i’w cyflawni: parhawn i ddarllen a chyd-ddarllen, gan annog eraill i ddarllen a mwynhau’r Beibl. Nid maes astrus i ysgolheigion ac arbenigwyr mo’r Beibl, ond cyfrwng i adnabod y Duw Dad, a’i Fab - Iesu ein harglwydd.

Trafod pwysigrwydd cyfieithu’r Gair Duw wnaeth y Gweinidog yn yr ail homili. Sonnir llawer heddiw am the problem of communication. Y mae’r drafferth hon yn real iawn i bobl Ffydd, am ein bod yn ymwneud cymaint â phethau o’r gorffennol pell. Llyfr wedi’i sgrifennu a’i gyfieithu canrifoedd yn ôl yw’r Beibl. Am fod iaith yn newid, ac amgylchiadau bywyd yn newid, mae’n rhaid wrth gyfieithiadau newydd o’r Beibl yn barhaus. Gwyddom, hefyd nad y llyfr sy’n rhoi bywyd tragwyddol inni, ond y Person y sonnir amdano yn y llyfr. Gwerth y Beibl yw ei fod yn tystio am Grist, a’n dyletswydd ninnau yw cyfieithu ein cyffes yn gymwynas, a’n credo yn credu - y geiriau’n Air Disglair Duw.

Liw nos, eto dwy homili a gafwyd; y naill yn seiliedig ar Effesiaid 4:1-13, a’r llall ar Luc 10:25-37 (Diolch Gwennith ac Elfan am ddarllen y Gair heno) Try’r ddwy homili ar yr un echel: Yn 1908 y cynhaliwyd yr Wythnos Weddi am Undeb Cristnogol am y tro cyntaf, er mai'r Wythawd Undod Cristnogol y’i gelwid y pryd hynny. Penderfynwyd ar ddyddiadau’r cyfnod fel wyth nos yn dechrau ar Ŵyl Cyffes Pedr (18 Ionawr) ac yn gorffen ar Ŵyl Tröedigaeth Paul (25 Ionawr).

Pan â defod yn bwysicach na Duw, ac arfer yn bwysicach nag addoli, a thraddodiad yn bwysicach na thröedigaeth, rhwygir undod yr Eglwys a pheryglir ei thystiolaeth. Mae’r Wythnos arbennig hon yn gyfle i gydnabod nad oes gan yr un gangen na phwyslais diwinyddol fonopoli ar y gwirionedd. Llawenhawn yn y goleuni mwy a’r ddealltwriaeth lawnach ddaeth drwy gydymgynghoriad, cyd-weithio a chyd-weddïo adrannau gwahanol o Eglwys Crist. Cydnabyddwn yn ddiolchgar gyfraniad gwerthfawr pob cangen o Eglwys Crist a rhyfeddwn at allu Duw i ddefnyddio cyfryngau mor wahanol i ddwyn tystiolaeth i’w Enw ger bron y byd. Yr wythnos hon, ac o’i herwydd, tywyser ni i brofi’n helaethach ein hundod yng Nghrist. Galwyd ni gan Grist i fod yn Un ynddo ef, i ddwyn tystiolaeth iddo ac i genhadu drosto yn y byd rhanedig hwn fel y sancteidder ei Enw drwom ni - pawb ohonom.

Mae disgwyl eiddgar am y Sul nesaf hwn. Gwyddom am ei weinidogaeth a’i arweiniad cadarn fel Ysgrifennydd Cyffredinol Eglwys Bresbyteraidd Cymru. Braint fydd cael cwmni'r Parchedig Meirion Morris. ‘Rydym yn gwybod y cawn ganddo bregethu meddylgar a phregethau gwerthfawr. Gweddïwn am wenau Duw ar y Sul.  Ein braint fel eglwys prynhawn Sul nesaf yw cael bod gyfrifol am de i'r digartref yn y Tabernacl, Yr Âis am 2:30

Diolch am amrywiol fendithion y dydd.

PREGETH NOS SUL

January 17, 2016 Owain Evans

Yr Wythnos o Weddi am Undod Cristnogol - 1

Y Nofel (Effesiaid 4: 1-13)

Beth yw nofel? Anodd cyffredinoli. Gall nofel gynnwys pethau mor wahanol i’w gilydd â Jane Eyre a Finnegan’s Wake, The Wind in the Willows ac Animal Farm; Traed mewn Cyffion a Leni Tiwdor. Cynnwys ‘Y Nofel’ pob ymdrech ar ran y llenor i greu mewn rhyddiaith ddarlun dychmygol o’r profiad dynol. Ni ellir diffinio yn fanylach na hynny. Mae’r Eglwys Gristnogol yn debyg i ‘Y Nofel’! Mewn ystafell fawr dychmyger Graham Greene (1904-1991) a Kate Roberts (1891-1935), Jane Austen (1775-1817) a Daniel Owen (1836-1895), T. Rowland Hughes (1903-1949) ac Iris Murdoch (1919-1999), T. Llew Jones (1915-2009) a Cormac McCarthy (gan.1933); J.K.Rowling (gan.1965) a Fflur Dafydd (gan.1978). Maent yn ysgrifennu; ceisio crisialu mewn geiriau eu deall o’r profiad dynol. Dyma gymysgwch cwbl ddi-ffurf. Yr unig beth sy’n cydio’r nofelwyr yn un teulu yw’r ffaith mai’r profiad dynol sy’n ddiddorol i bob un ohonynt. I hyn yr ymdebyga'r Eglwys Gristnogol. Er bod arddull yr amrywiol ‘nofelwyr’ Cristnogol yn wahanol, yr un yw’r nod: mynd i’r afael â’r profiad dynol o ewyllys cariadlawn Duw. Creu pobl yw busnes nofel; creu byd arall. Onid dyna waith yr Eglwys Gristnogol? Creu byd arall, a’i greu yn fyw: Deled dy deyrnas. Gwneler dy ewyllys, megis yn y nef, felly ar y ddaear hefyd (Mathew 6:10), a hynny trwy greu pobl newydd yng Nghrist: os yw dyn yng Nghrist, y mae’n greadigaeth newydd (2 Corinthiaid 5:17). Hynny yw, pobl sydd, mewn gair a gweithred, yn ysgogi ymateb, sydd a’i hesiampl yn gymorth i ni ac yn her i fyw ymhell y tu hwnt i derfynau eu cyfnod a chyfyngiadau eu hoes.

Ceir nofelau mawrion, oesol eu hapêl a’u cyfraniad, a nofelau bychain, niwlog a diddim. Dyma'r Eglwys Gristnogol? Y nofelau sy’n aros yn y cof yw’r rheini sy’n cael eu gyrru ymlaen gan ryw weledigaeth sy’n rhoi undod, cyfeiriad, a phwrpas i’r cyfan. Crea’r nofelydd gymeriadau a byd er gwasanaeth i’r weledigaeth ganolog honno. Holed pob eglwys ac aelod ei hun: pa fath ‘nofel’ Gristnogol ydym ni? Nofel ag iddi derfynau lleol, ieithyddol a diwylliannol, ond sydd oherwydd berw’r ffydd, gobaith a chariad sydd ynddi, yn codi tu hwnt i’r terfynau, gan sicrhau dylanwad dwfn a bendith eang a phellgyrhaeddol? I’r Cristion, gweithio a chydweithio i fod y fath hon o ‘nofel’ yw’r unig lwyddiant i ymgyrraedd ato; hyn neu fodloni ar fod yn pulp fiction crefyddol.

Yr Wythnos o Weddi am Undod Cristnogol - 2

Ffuglen (Luc 10: 25-37)

A yw ffydd yn debyg i ffuglen? Ffuglen yw War and Peace (Leo Tolstoy, 1828-1910); ynddi mynega’r awdur wirionedd bythol newydd, ac oesol gyfoes. Trwy gyfrwng ffuglen, cyflwynir holl ystod cydymdeimlad cariadlawn Tolstoy â’i bobl yn Rwsia. Trwy ffuglen cafwyd gwirionedd. Crëir cydymdeimlad, nid gan eitem newyddion, nac ychwaith trwy ymwybyddiaeth o realiti eraill, ond trwy ffuglen ddofn a dwys. "Pa fath brofiad yw bod y bachgen Mwslimaidd hwn?" meddyliai’r bachgen o Gymro Cristnogol un bore. I ateb, crëir ffuglen. Try’r bachgen bach o Gymro Cristnogol yn fachgen Mwslimaidd. Gwisga, addola a ‘byw’ bywyd y bachgen Mwslimaidd. Ydi’r manylion yn gwbl ffeithiol gywir? Nac ydynt! Ffuglen ydyw a blasu’n wahanol wna geiriau fel ‘Mwslim’, ‘Islam’ a ‘Mosg’. Trwy gyfrwng ffuglen pur crëir cydymdeimlad. Mae pob perchen ffydd yn gorfod creu ffuglen. Mae geiriau Iesu: ... a châr dy gymydog fel ti dy hun (Luc 10:27) yn hawlio ymdrech mewn ffuglen. Myn y geiriau hyn, fy mod i, wrth dy weld di, yn gweld fy hun; ac, o’r herwydd, yn ymwneud â thi yn union fel y byddwn yn ymwneud â fi fy hun. Myn Iesu ein bod yn ymrwymo i’r ffuglen: TI = FI; byw'r ffuglen hon hyd nes i ni anghofio mai ffuglen ydyw! Dyma hanfod ein ffydd: adeiladu realiti ar sylfaen y ffuglen TI = FI, FI = TI.

That is what we are supposed to do when we are at our best - make it all up - so truly that later it will happen that way. (llythyr gan Ernest Hemingway (1899-1961) i F. Scott Fitzgerald (28/5/1934))

PREGETH BORE SUL

January 17, 2016 Owain Evans

Blwyddyn y Beibl Byw – 1

 5SistrsWntngHsbnds. NwMenInTwn-Bingly&Darcy-Fit&Loadd. BigSisJaneFals4B,2ndSisLiz H8sDCozHesProud.SlimySoljrWikamSysDHsShadyPast.TrnsOutHesARlyNysGuy&FancysLiz.SheDecydsSheLyksHim.Evry1GtsMaryd.

 Pa nofel yw hon? Pride and Prejudice! (Five sisters wanting husbands. New Men in townBingley and Darcy - fit and loaded. Big sister Jane falls for Bingley. Second sister Elizabeth hates Darcy because he’s proud. Slimy soldier Wickham says that Darcy has a shady past. Turns out he’s a really nice guy and fancies Elizabeth. She decides that she like him. Everyone gets married.)

How to Talk About Books You Haven’t Read (Pierre Bayard, gan. 1954). Llyfr i’r honedig-ddiwylliedig. Yn ôl yr awdur, mewn cwmni o bobl lyfryddol, dylid rhoi llyfr mewn un o bedwar categori cyn penderfynu beth sydd orau i gyfrannu i’r sgwrs heb amlygu anwybodaeth: UB: book unknown to me; SB: book I have skimmed; HB: book I have heard about; a FB: book I have forgotten. I drwch Cymry 2016, FB yw’r Beibl. I rai mae’n HB, ac i’r mwyafrif llethol o ieuenctid mae'n UB. Pam? Onid am mai llyfr SB yw i’r union bobl hynny a ddylai fod yn ei ddarllen o ddifri, a’i drafod yn gall a chyson? Llwyddasom i droi llyfr cwbl berthnasol i bopeth yn gwbl amherthnasol i ddim. Magu chwilfrydedd Beiblaidd yn ein heglwysi yw’r gwaith pwysicaf y gelwir arnom i’w gyflawni. Dylai pobl ffydd gymryd at astudiaeth Feiblaidd ‘fel cath at laeth’! Yn hytrach, ynganwn y gair ‘Astudiaeth’, fel petai ein ceg yn llawn halen! Nid yw’r Beibl wedi achub neb erioed ac, ydyw, mae’r Gair yn fwy na’r geiriau. Na ato Dduw i ni anghofio bod y Gair yn y geiriau, a gwir fawl i’r Gair yw darllen a thrafod y geiriau.

Blwyddyn y Beibl Byw - 2

Camp yr Esgob William Morgan (1545-1604) oedd safoni’r iaith Gymraeg a’i chadw’n fyw. Trodd ieithoedd gwreiddiol y Beibl yn Gymraeg darllenadwy. "’Rwy’n gweld eich bod yn darllen y Beibl", meddai’r gweinidog ifanc wrth yr hen wraig, "Na, machgen i, y Beibl sy’n fy narllen i", atebodd. Dyna pam y bu Cristnogion ar hyd y canrifoedd yn cyfieithu’r Gair, yn cymell pobl i’w brynu, yn dysgu pobl i’w darllen, yn sefydlu Cymdeithasau Beiblaidd i rannu copïau ohono, a’i gyflwyno mewn iaith lafar, ddealladwy, fel Arfon Jones ac Ymddiriedolaeth Gobaith i Gymru.

Sicrhaodd William Morgan ein bod yn clywed ‘am y tro cyntaf y Tad, y Mab a’r Ysbryd Glân yn parablu yn Gymraeg.’ (Yr Esgob William Morgan gan Gwenallt (1899-1968) o Gwreiddiau, Gwasg Aberystwyth; 1959). Boed i ni feithrin ynom y dygnwch a’r dewrder i barhau â’r gwaith o gyfieithu Gair Duw. Gwaith allweddol pwysig ond anodd yw cyfieithu Gair Duw. Mae’n galw am gyfuniad o ddeall ieithyddol a chrebwyll diwylliannol fel dengys hanes Wilfred Grenfell (1865-1940) fu’n cenhadu yn Labradôr a’r Tir Newydd. Nid oedd ganddynt ddefaid, felly nid oedd geiriau am ‘fugail’ ac ‘oen’ yn golygu dim i’r trigolion ac nid oeddent yn bodoli yn eu hiaith. Newidiodd Grenfell y geiriau: Trannoeth gwelodd Iesu’n dod tuag ato, a dywedodd, ‘Dyma Forlo Duw, sy’n cymryd ymaith bechod y byd! (addasiad o Ioan 1:29) Cynhyrfwyd un wraig yn fawr gan hyn ac anfonodd tegan ar ffurf oen i Grenfell. O hynny allan bu’r cenhadwr yn defnyddio’r ymadrodd ysgrythurol, yn hytrach na gair cwbl anysgrythurol wrth gyfathrebu’r Efengyl. Y wers: ystyr geiriau gwreiddiol y Beibl sy’n bwysig, nid y geiriau eu hunain. Nid yr un yw dweud fod Gair Duw yn y Beibl â dweud mai’r Beibl yw Gair Duw. Nid y llyfr sy’n rhoi bywyd inni, ond y Person y sonnir amdano yn y llyfr. Canfod y trysor yn y llestri pridd yw’r gamp. Rhaid gwahanu rhwng y geiriau a’r Gair. Mae galw ar bob perchen ffydd i gyfieithu’r ffydd honno’n ffordd o fyw. Cyfryngau yw’r Beibl, ffydd, cyffes a chred i amlygu gogoniant y Cyfryngwr. Yn ein hymdrechion i gyfieithu ein cyffes yn gymwynas, ein credo yn credu na foed i ni ddrysu rhwng y morlo a’r oen, rhag i bobl, o’n herwydd fethu gweld y Cyfryngwr oherwydd y cyfryngau.

 

 

← Newer Posts Older Posts →

Eglwys Annibynnol Minny St.
Y Waun Ddyfal, Caerdydd
CF24 4ER

Lawrlwytho
Dogfennau

©minny St 2021