'YMLAEN': Y SUL A'R WYTHNOS NEWYDD
Yn yr Oedfa Foreol (10:30) bydd Owain yn cloi’r gyfres o bregethau: Awn i Fethlem, bawb dan ganu. Echel y bregeth olaf hon fydd Luc 2:15 a dyma’r tri pheth i gofio:
1. Gweld yr Hwn a ddaeth.
2. Gweld yr Hwn a ddaeth atom.
3. Gweld yr Hwn a ddaeth atom i aros.
Bydd ein cyfnod o weddi a gweddïo yn troi ar echel y Colect am y Sul olaf hwn yn Adfent:
Cyfod yn dy nerth, O! Arglwydd, a thyred i’n plith, ac â’th allu mawr cymorth ni, fel, oherwydd i ni gael ein rhwystro gan ein pechodau rhag rhedeg yr yrfa a osodir o’n blaen, y bo i’th ras a’th drugaredd ein cynorthwyo a’n gwared yn ebrwydd; trwy Iesu Grist ein Harglwydd, y bo iddo gyda Thi a’r Ysbryd Glân, bob anrhydedd a gogoniant yn oes oesoedd. Amen.
Liw nos (18:00) yn yr Oedfa Hwyrol, bydd pregeth Owain ar ffurf tair monolog. Cawn gwrdd â gŵr y llety (Luc 2:7) a dysgu ganddo am beryglon y cant a mil o bethau. Un o’r doethion fydd yn rhannu ei brofiad nesaf (Mathew 2:1-2) gan esbonio pam mai dim ond aur, thus a myrr oedd ganddynt yn rhodd i’r brenin bychan hwn. I gloi, gair gan un o’r bugeiliaid (Luc 2:8-18): cawn ein hannog ganddo i ystyried llygad y storm.
Cannwyll yn llosgi bydd canolbwynt ein sylw wrth weddïo gyda’n gilydd.
Diolch i Manon, Mared, Enlli a Lleucu am eu cymorth.
Methu dod i’r Oedfaon? Ymunwch â ni trwy gyfrwng negeseuon trydar @MinnyStreet #AddolwnEf Dechrau toc wedi 10:30/18:00.
Bydd naws yr Adfent yn parhau ar #BoreolWeddi #HwyrolWeddi @MinnyStreet a bydd Coeden Jesse yn tyfu a datblygu bob dydd ar y wefan hon. Ymunwch â ni. Boed bendith yn wir.
Pot Pourri’r Nadolig (24/12; 23:30) - Gwasanaeth Noswyl Nadolig. Oedfa syml, anffurfiol a bendithlawn. Dewch â chroeso mawr.
Oedfa’r Nadolig (25/12: 10yb) yng Nghapel y Crwys (Heol Richmond); ymunwn â chyfeillion Eglwys y Crwys a phregethir gan Owain: 12 Drymiwr fydd testun ein sylw!
Dydd Gwener (28/12; 10:30-13:00): Taith Gerdded (manylion llawn yng nghyhoeddiadau’r Sul).
ADFENT 2018: 'O! TYRD, FLAGURYN JESSE, NAWR' (21)
Heddiw, Angylion yw testun ein sylw.
Oherwydd rhydd orchymyn i’w angylion i’th gadw yn dy holl ffyrdd ... (Salm 91:11)
Peidiwch ag anghofio lletygarwch, oherwydd trwyddo y mae rhai, heb wybod hynny, wedi rhoi llety i angylion. (Hebreaid 13:2)
Llun: Kvams Flisespikkeri
Heddiw, tri dyfyniad; y cyntaf gan William Williams, Pantycelyn (1717-1791), yr ail gan Ann Griffiths (1776-1805), a’r olaf, yn Saesneg gan yr awdur Americanaidd Kurt Vonnegut (1922-2007). Ni fu Vonnegut yn fath gwmni aruchel erioed am wn i!
Pe meddwn ddawn angylion,
a harddwch seintiau fry,
y cariad, sêl, doethineb gan y cerubiaid sy’,
Pe meddwn holl berffeithrwydd y dynion gorau gaed,
Casawn fy hun yn ffiaidd, mi syrthiwn wrth dy draed.
(Golwg ar Deyrnas Crist)
Rhyfedd, rhyfedd gan angylion
rhyfeddod fawr yng ngolwg ffydd
gweld rhoddwr bod, cynhaliwr helaeth,
a rheolwr pob peth sydd,
yn y preseb mewn cadach,
a heb le i roi’i ben i lawr,
ac eto disglair lu’r gogoniant
‘N ei addoli’r Arglwydd mawr.
There is no reason why good cannot triumph as often as evil. The triumph of anything is a matter or organisation. If there ar such things as angels I hope they are organised along the lines of the Mafia.
(Sirens of Titan)
Diolch i ti, Annwyl Dad, am bob angel a anfonaist i’m hebrwng ar y daith. Amen.
‘DUW YN Y BYD FEL DYN BACH’ (4)
ADFENT 2018: 'O! TYRD, FLAGURYN JESSE, NAWR' (20)
Y cwpan hwn yw’r cyfamod newydd yn fy ngwaed i ... (Luc 22:20)
Felly, os yw dyn yng Nghrist, y mae’n greadigaeth newydd; aeth yr hen heibio, y mae’r newydd yma. (2 Corinthiaid 5:17)
Llun: Charles Walker
Rhywbeth dynamig, newydd a chreadigol ffres yw’r ffydd Gristnogol. Ein gwaith ni - pawb ohonom, o’r ieuengaf i’r hynaf - yw bod yn arbrofol fentrus, yn chwyldroadol greadigol er mwyn codi pontydd rhwng ein daliadau crefyddol ar y naill law, ac angen byd ar y llall. Peidiwn ag osgoi’r her, gan fod y cyfan wedi ei sylfaenu ar un o golofnau cadarnaf ein ffydd: "Y mae’r dyddiau’n dod, medd yr ARGLWYDD, "y gwnaf gyfamod newydd â thŷ Israel ac â thŷ Jwda. Ni fydd yn debyg i’r cyfamod a wneuthum â’u hynafiaid, y dydd y gafaelais yn eu llaw i’w harwain allan o wlad yr Aifft ... rhof fy nghyfraith o’u mewn, ysgrifennaf hi ar eu calon, a byddaf fi’n Dduw iddynt a hwythau’n bobl i mi."(Jeremeia 31:31-34)
Crea galon lân ynof, annwyl Dduw, ac adnewydda ysbryd uniawn o’m mewn. Amen.
‘DUW YN Y BYD FEL DYN BACH’ (3)
ADFENT 2018: 'O! TYRD, FLAGURYN JESSE, NAWR' (19)
Heddiw, Nehemeia - yr adeiladydd, yw testun ein sylw.
Awn ati i adeiladu. A bu iddynt ymroi i’r gwaith yn ewyllysgar ... (Nehemeia 2:18)
... trwy gymorth ein Duw y cafodd y gwaith hwn ei wneud ... (Nehemeia 6:16)
‘Roedd Jerwsalem mewn cyflwr truenus, y muriau yn adfail. Tynnodd Nehemeia ei bobl ynghyd trwy waith, i waith i godi Jerwsalem, eto, ar ei thraed. Oherwydd Nehemeia, ‘roedd gan ei bobl galon i weithio (4:6). Y rheswm pam mae crefydd cymaint ohonom mor dila, mor analluog roi gwir foddhad inni, yw mai crefydd ddi-waith ydyw - nid oes gennym galon i weithio - a hynny mewn dyddiau sy’n galw’n daerach nag erioed am grefydd yn ei dillad gwaith.
Pan fyddo achos Iesu yn eiddil a diglod, cadw pawb ohonom yn dy waith. Amen.
Llun: Jacques Joseph Tissot
