Pos wythnosol.
Ffordd hawdd a hwyliog i ehangu ein gwybodaeth Feiblaidd.
Daw'r ateb tua 21:00
Pa adnod NAD sydd yn perthyn i’r gweddill, a pham?
MINNY’D (30) 100-99-1
‘Minny'd’?
Myfyrdod sydyn syml yw 'Minny'd'.
Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.
'YMLAEN': Y SUL A'R WYTHNOS NEWYDD
Dros y Sul, ein braint fel eglwys fydd cael gwrando cenadwri a derbyn arweiniad gan y Parchedig Ddr Geraint Tudur (Ysgrifennydd Cyffredinol Undeb yr Annibynwyr). Gwyddom y cawn ganddo bregethu meddylgar a phregethau buddiol a bendithlawn. Yn ôl ein harfer, bydd yr Oedfa Foreol am 10:30. Cynhelir yr Ysgol Sul. Mari Fflur fydd arwain y defosiwn. Bydd yr Oedfa Hwyrol am 18:00. Gweddïwn am wenau Duw ar Oedfaon y Sul.
Bydd ein Diaconiaid yn cwrdd nos Lun. Gofynnwn am arweiniad Duw wrth edrych a threfnu i’r dyfodol.
Nos Fercher (25/4; 19:00-21:00): Gwasanaeth gyda ffair a noson goffi i ddilyn er budd Cymdeithas y Beibl yn y Tabernacl, Yr Ais; anerchiad gan y Parchedig Denzil John.
Bore Gwener (27/4; 10:00): ‘Llynyddwch’. Paned wrth ymyl llyn llonydd y Rhath. Yn Terra Nova cawn gyfle i drafod, fesul pennod, llyfr Samuel Wells: How then shall we live (Canterbury, 2016). Echel ein trafodaeth fore Gwener fydd Disappointment (t.148-152).
YN ANAD UN (11) - ATEB
Salm 73.17
Tra bod yr adnodau eraill yn sôn am ‘dechrau/dechreuad’ mae’r Salm yn sôn am ‘diwedd’.
YN ANAD UN (11)
Pos wythnosol.
Ffordd hawdd a hwyliog i ehangu ein gwybodaeth Feiblaidd.
Daw'r ateb tua 21:00
Pa adnod NAD sydd yn perthyn i’r gweddill, a pham?
MINNY’D (29) BERFAU
‘Minny'd’?
Myfyrdod sydyn syml yw 'Minny'd'.
Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.
'BETHANIA' - POBL YR HEN DESTAMENT
‘Bathsheba’ gan Marc Chagall (1887-1985)
BATHSEBA (1)
2 Samuel 11:1-4
Syllodd Dafydd yn ofalus arni ... y mwyaf i gyd yr edrychai, y mwyaf i gyd y dymunai ei chael! Heb oedi dim galwodd amdani a gorwedd gyda hi. Yna aeth Bathseba adref!
Beth a wyddom amdani? Pwy oedd Bathseba? Yn wraig briod mewn cymdeithas batriarchaidd, rhaid ei bod yn gwybod mai’r gosb am odineb oedd marwolaeth. Pam ildio mor hawdd i Dafydd? Ofn? Pwy all ddweud ‘Na’ wrth frenin? Uchelgais? Wedi trefnu’r cyfan yn ofalus, i’r manylyn lleiaf, a rhwydo Dafydd?
Beth am Ureia, gŵr Bathseba (2 Samuel 11: 3, 15, 24 a 26)? Oedd ei farw yntau yn dristwch iddi neu’n rhyddhad (sylwch ar 2 Samuel 11: 27)? Ni wyddom! Wrth i ni gyfarfod â hi am y tro cyntaf mae Bathseba yn gymeriad dyrys a dirgel. Ni sydd yn gorfod penderfynu - ai gwraig ddiniwed yn ysglyfaeth i rym a chwant brenin oedd hi, neu feistres ei ffawd?
BATHSEBA (2)
1 Brenhinoedd 1:15-21
Mentrwn ymlaen ychydig flynyddoedd. Mae Dafydd bellach yn wan, a haul ei frenhiniaeth yn brysur fachlud. Mae cwestiwn dewis ei olyniaeth heb ei benderfynu. Mae’r mab, Adoneia, cryf a phenstiff (rhyfedd o debyg i’w dad i ddweud y gwir!) yn hawlio’r orsedd, a Joab, cadfridog y fyddin, ac Abiathar, offeiriad Dafydd yn gefn iddo. Mae Nathan o blaid Solomon. Nathan sydd yn perswadio Bathseba i achub y blaen ar Adoneia a’i garfan. Aeth Bathseba i mewn at Dafydd a’i atgoffa ei fod wedi addo’r deyrnas i Solomon. Mae hi’n cydio yn yr awenau a gyda chefnogaeth hollbwysig Nathan yn sicrhau’r orsedd i Solomon.
O ferch ifanc hardd yn cael ei galw i bresenoldeb brenin, i fam-frenhines gall a chraff, mae mwy i hon na welir! Cymeriad dyrys a dirgel - ni waeth beth ddaeth ar ei thraws, mynnodd oroesi.
Yn sgil stori Dafydd a Bathseba gellid trafod yr adnodau isod:
"Bydd drugarog wrthyf, O Dduw, yn ôl dy ffyddlondeb; yn ôl dy fawr dosturi, dilea fy meiau; golch fi’n lân o’m heuogrwydd, a glanha fi o’m pechod." (Salm 51: 1-2)
"Arglwydd, yr wyt wedi fy chwilio a’m hadnabod ..." (Salm 139: 1)
'YMLAEN': Y SUL A'R WYTHNOS NEWYDD
Bore Sul am 10:30 bydd ein Gweinidog yn ystyried anogaeth Iesu: Edrychwch ar adar yr awyr ... (Mathew 6:25-34). Dyna’n syml bydd echel y bregeth - edrych ar adar yr awyr, a dysgu gan aderyn y to, y wennol a’r eryr. Cynhelir yr Ysgol Sul.
"The Mad Harpist’s Tea Party": Cyngerdd a Chacen yng nghwmni Manon Browning (16:30-17:30; manylion llawn yng nghyhoeddiadau’r Sul).
Liw nos (18:00) bydd pregeth y Gweinidog yn trafod yr hyn a ellid ei ddysgu am ffydd a chredu gan ... y pry’ copyn, y falwoden a’r dylluan!
Bydd y gymdeithas yn parhau yn Koinônia: swper blasus a sgwrs ddifyr mewn bwyty Eidalaidd cyfagos.
Nos Lun (16/4; 19:00-20:30) - PIMS.
Nos Fawrth (17/4; 19:30-20:30): ‘Bethania’. Echel ein trafodaeth eleni yw ‘Pobl yr Hen Destament’. Parhawn gyda BATHSEBA (2 Samuel 11:1-4; 1 Brenhinoedd 1:15-21).Darperir nodiadau ‘Bethania’ rhag blaen ar y wefan hon bore dydd Llun.
Babimini bore Gwener (20/4; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.
