Yfory - Ebeneser - pawb ynghyd yng Nghanolfan yr Eglwys Newydd 10. 17:30 yn Eglwys Canol y Ddinas: y Parchg Meirion Morris. Boed bendith.
PAWB YNGHYD YNG NGHAPEL MINNY STREET
Yfory, pawb ynghyd yng Nghapel Minny Street 10:30 y bore a 6 yr hwyr: Dafydd Iwan (Caeathro, Caernarfon). Boed bendith.
Bydd cyfle i gyfrannau nwyddau tuag at Fanc Bwyd Caerdydd yn ystod y dydd.
PAWB YNGHYD YNG NGHAPEL Y TABERNACL
Yfory, pawb ynghyd yng yng Nghapel y Tabernacl (Yr Ais) 10:30 y bore a 6 yr hwyr: y Parchedig Dafydd Andrew Jones (Caerdydd). Boed bendith.
COFIO HIROSHIMA
Bu'r bys ar y botwm,
Ffrwydrodd yr wybren;
Cododd carreg fedd o fwg.
PAWB YNGHYD YNG NGHAPEL Y CRWYS
Yfory, pawb ynghyd yng Nghapel y Crwys (Heol Richmond) 10:30 y bore a 6 yr hwyr: yr Athro John Gwynfor Jones (Caerdydd). Boed bendith.
Ein braint fel eglwys fydd paratoi te i’r digartref (14:30 - 16:00)yn y Tabernacl, Yr Âis.
SALM
Salm 150
Down at y Salm olaf ac ni allem ddymuno rhagorach diweddglo i’r ‘flwyddyn waith’ hon. Salm fawr yw Salm 150 - mawr ei gweledigaeth, ond cwbl ddiwastraff ei geiriau. Gelwir ar y nef a daear i atseinio mawl i’r Duw mawr, sydd mor nerthol ei weithredoedd ac mor ogoneddus ei fawredd. Yna, gwahoddir yr offerynnau i ymuno: utgorn, nabl a thelyn, pibau a symbalau. Nid anghofir y ddawns. Cofiwn fod lle pwysig iawn, erioed, i ddawns mewn defod grefyddol! Yn olaf gelwir ar bopeth byw i foliannu’r ARGLWYDD - gyda hynny chyrhaeddwn yr haleliwia derfynol: Molwch yr ARGLWYDD!
'YMLAEN': Y SUL A'R WYTHNOS NEWYDD
Ym mis Mai 2013, cyhoeddwyd Adroddiad o Drafodaethau ac Argymhellion Gweithgor Gweinidogaeth Eglwys Minny Street. Y cyntaf o bum flaenoriaeth a nodwyd i waith a chenhadaeth yr eglwys hon oedd Addoliad. Wrth ymfalchïo yn arddull, naws ac ehangder ein haddoliad, teimlai’r Gweithgor bod yna gyfleoedd i gynyddu ymwneud aelodau yn ein hoedfaon. Hyn, nid yn unig er mwyn datblygu "gweinidogaeth yr holl saint", ond hefyd, fel modd i feithrin cynulleidfa a fydd, gobeithio, yn fwy parod i ymgymryd â threfnu ac arwain oedfaon pan fydd, efallai, mwy o alw (e.e. cyfnod di-weinidog). Cytunwyd bod angen meithrin, ymysg ein haelodau, barodrwydd i gynnig gwasanaeth yn hytrach na disgwyl i rywun ofyn. Gwelwyd hefyd gyfleoedd trwy’r fath ymwneud i ennyn ymdeimlad o gyd-weithio ymysg grwpiau o aelodau’r gynulleidfa.
Bellach, mae pob pumed Sul yn y mis yn gyfle i aelodau’r eglwys i drefnu a chynnal yr addoliad. Buddiol a bendithiol yw hyn. Bydd ein Hoedfa Foreol (10:30) dan arweiniad aelodau a chyfeillion Parc y Rhath, Llwynbedw a’r Mynydd Bychan. Dyma’r ffrwyth mae’r Ysbryd Glân yn ei dyfu yn ein bywydau ni: cariad, llawenydd, heddwch dwfn, amynedd, caredigrwydd, daioni, ffyddlondeb, addfwynder a hunanreolaeth (Galatiaid 5:22,23 beibl.net). Bu’r rhinweddau a enwir gan Paul yn ei lythyr at bobl Iesu yn Galatia yn echel gwaith yr Ysgol Sul a PIMS trwy gydol y flwyddyn waith hon. Gweddïwn am fendith ein Duw, awdur pob rhinwedd a ffynhonnell pob daioni ar yr Oedfa arbennig hon a fydd yn ystyried pob rhinwedd yn ei dro.
Bydd paned a nwyddau Masnach Deg yn y Festri wedi’r Oedfa.
Bydd yr Oedfa Hwyrol (18:00) yng ngofal aelodau a chyfeillion Cyncoed a Phenylan. Trwy gyfrwng yr Oedfa hon byddwn yn dod i adnabod un o broffwydi mawr yr Hen Destament. Mae ei enw’n gyfarwydd i ni, gwyddom rywfaint o’i hanes ond buom ychydig yn ofidus rhag mentro’n rhy agos ato. Down i adnabod Jeremeia trwy gyfrwng pum pen byr, sydd, mewn gwirionedd yn ymdoddi’n un neges: Galwad Jeremeia; Pregeth Jeremeia; Gofid Jeremeia; Gweddi Jeremeia ac i gloi neges y proffwyd.
Bydd paned a nwyddau Masnach Deg yn y Festri wedi’r oedfa.
Dyfal bu’r paratoi, a dygn y trefnu i sicrhau fod gan bawb - o’r ieuengaf i’r hynaf - ei le, cyfle a chyfraniad. Pawb a’i waith, a gwaith i bawb wrth gynnal gwasanaeth ac offrymu mawl ac addoliad. Gweddïwn am wenau Duw ar y Sul.
COED YR ARDD
'Munud i Feddwl' ein Gweinidog
'Adam and Eve hide their Nakedness' gan Ruth Collet (1909-2001)
Y ffurfafen oedd las, yr hin oedd deg - gosodwyd dyn i ddechrau byw, yn ôl awdur Genesis, mewn gardd - gardd o drefniant Duw. Caed ynddi goed defnyddiol a dymunol, ac yn eu plith yn tyfu Pren y Bywyd a phren Gwybodaeth Da a Drwg.
Ymguddiodd Adda ac Efa o olwg Duw ymysg coed yr ardd (Genesis 3:18). Mae yna dristwch yn perthyn i’r adnod hon - tristwch yn tarddu nid dim ond o’r ffaith iddynt deimlo’r awydd i guddio, ond eu bod nhw wedi dewis cuddio ymysg coed yr ardd. Cynnyrch Duw oedd coed yr ardd, ei rodd yntau iddynt, a dyma’r ddau hun - ti a minnau - yn eu defnyddio i guddio rhagddo!
Myn y Beibl fod Duw yn cuddio rhag ei bobl. ‘Roeddwn wedi arfer meddwl fod Duw yn cuddio rhagom oherwydd ein drygioni: ...ond eich camwedd chwi a ysgarodd rhyngoch a’ch Duw, a’ch anwiredd chwi a barodd iddo guddio’i wyneb rhag gwrando arnoch (Eseia 59:2). Bellach, dw i’n credu fod Duw yn cuddio rhagom oherwydd ein bod yn dewis ymwneud â’r da mewn ffordd mor ddrwg, nes gwthio Duw oddi wrthym.
Onid, dyna ergyd Dameg y Wledd Fawr (Luc 14:15-24)? Wrth ddarllen, gwelwn mai pethau da ynddynt eu hunain a gadwodd y gwahoddedigion o’r wledd - prynu darn o dir, profi ychen newydd, priodi. Nid oedd dim yn ddrwg am yr un o’r pethau hyn. Yn wir, pethau da oeddent; ond ‘roedd defnyddio’r pethau da hyn mewn ffordd ddrwg yn ddigon i’w cadw bob un o’r Wledd fwyaf un!
Credaf fod Duw o hyd yn plannu gerddi i’w bobl, ac yn eu cyfoethogi â choed defnyddiol a dymunol, ac yn eu plith mae Pren y Bywyd a Phren Gwybodaeth Da a Drwg. Mynnwn ninnau ... o hyd fyth ... ddefnyddio ei roddion yntau i ni er mwyn cuddio rhagddo.
Sut bynnag a ddarllenwn stori Adda ac Efa - yn llythrennol, neu fel arall - rhaid cydnabod a chyhoeddi nad yw gwers y stori wedi ei dysgu o gwbl - sef mwynhau gardd Duw, heb droi cefn ar Arglwydd yr ardd.
Mynnwn y cyfle i ddod allan o fysg y coed. Cydnabyddwn o'r newydd mai Duw sydd biau ni, ac ar ei drugareddau/yr ydym oll yn byw (Elfed 1860-1953 Caneuon Ffydd 130)
