NEWYDDION Y SUL

Hir bu’r edrych ymlaen at Sul Arbennig Cyfundeb Dwyrain Morgannwg! Yn ‘blantos’ a phlant, yn bobl ifanc ac oedolion, llanwyd neuadd Ysgol Pen-y-Garth y bore heddiw. Y Beibl Byw oedd thema’r Oedfa o Fawl. Yn absenoldeb y Llywydd, y Parchedig Ddr Alun Tudur; Ysgrifennydd y Cyfundeb, y Parchedig Dyfrig Rees, gweinidog Eglwys Tabernacl, Pen-y-bont ar Ogwr oedd yn llywyddu; Iona Edwards, Pennaeth Ysgol Pen-y-Garth oedd yn canu’r piano. Cyflwynwyd y defosiwn agoriadol gan aelodau Ysgol Sul Eglwys y Tabernacl, Pen-y-bont ar Ogwr: Dameg y Ddwy Sylfaen (Mathew 7:24-29).

Cafwyd cyflwyniad diddorol gan gynrychiolwyr Eglwys Ebeneser, Caerdydd am ystyr ac arwyddocâd y Gyfraith. Ein thema ninnau fel eglwys oedd Doethineb. Tad a mab fu wrthi: Owain Llyr a Connor. Cystal cydnabod mae braidd yn sych oedd cyflwyniad y tad (sylwch ar wyneb Connor yn y llun isod), ond llwyddodd Connor i achub cam ei dad gan gyflwyno'n gymen a chlir neges graidd llyfrau Doethineb y Beibl gan ddefnyddio dim ond llythrennau’r gair ‘Doethineb’. 

Ymateb y mab i gyflwyniad diflas ei dad

Eglwys Mynydd Seion, Casnewydd ysgwyddodd y dasg anferthol o gyflwyno holl ystod Llyfrau Hanes yr Hen Destament, a hynny gyda graen. Gan Eglwys Tabernacl, Porthcawl cawsom gyflwyniad manwl a llawn i holl ystod gweinidogaeth y proffwydi, ‘bach’ a ‘mawr’. Cyn mentro i'r Testament Newydd, ein braint oedd cyd-ganu hyfryd eiriau Euryn Ogwen. Dyma'r geiriau i'ch sylw, er budd a bendith:

Croesawyd cyflwyniad Eglwys Bethlehem, Gwaelod-y-garth gyda gwên a chwerthiniad. Thema Bethlehem oedd yr Efengylau; ffurfiwyd panel ‘Hawl i Holi’. Panel braidd yn lletchwith, ond llwyddodd y Parchedig Ddr R. Alun Evans i gadw trefn arnynt! Pwy oedd y gwestai? Mathew, Marc, Luc ac Ioan wrth gwrs! Gan Eglwysi Tabernacl, y Barri a Bethel, Penarth cawsom gyflwyniad gofalus a llawn i’r Epistolau. Eglwys y Tabernacl, Efailisaf fu’n gyfrifol am dynnu’r llinynnau ynghyd, gan gyflwyno sylwadau treiddgar a pherthnasol am yr angen i ddarllen a chyd-ddarllen y Beibl

Fel ym mhob Sul y Cyfundeb, gwneir casgliad arbennig ar ddiwedd yr oedfa. Eleni gwaith a gweinidogaeth Cymdeithas y Beibl oedd yn derbyn cefnogaeth. Yn dilyn yr oedfa cafwyd parhau mewn cymdeithas dros baned wedi ei pharatoi gan aelodau Eglwysi Barri a Phenarth. Trefnwyd yr oedfa gan Ysgrifennydd y Cyfundeb; teimlai pawb oedd yn bresennol mai da oedd bod yno. Cafwyd bendith ac ysbrydoliaeth o gyd-addoli a phrofi koinônia.

Cynulleidfa Oedfa o Fawl, Sul Arbennig Cyfundeb Dwyrain Morgannwg

Er i’r Oedfa orffen; cafwyd cyfle i barhau ein gwasanaeth yn y Tabernacl, yr Âis. Ein braint heddiw, fel eglwys, oedd cael bod yn gyfrifol am baratoi te i’r digartref.

Yn yr Oedfa Hwyrol, daeth cyfres 'Y Flwyddyn 70 ac Efengyl Marc' i ben. Cyfres dda bu hon; 8 pregeth: addysg, bendith a her.

Efengyl Marc a ysgrifennwyd gyntaf adeg cwymp Jerwsalem. Wedi cwymp Jerwsalem, dim ond y Phariseaid a’r Iddewon Cristnogol oedd ar ôl. Mynnai’r Phariseaid mai canlyniad esgeulustod y bobl o ofynion Cyfraith Duw oedd cwymp Jerwsalem. Mynnai’r Iddewon Cristnogol mai canlyniad esgeulustod y bobl o neges Cyfraith Duw - neges cariad Iesu Grist - oedd dinistr y Deml. Beth yw arwyddocâd hyn oll i ni fel eglwysi, ac i grefydd a chrefydda yng Nghymru?

Yna aethant ag ef allan i’w groeshoelio. Gorfodasant un ... Simon o Cyrene, tad Alexander a Rwffus, i gario ei groes. (Marc 15: 20-21) Wrth i Iesu grymu dan ei groes daeth Simon o Cyrene i’w gynorthwyo; gwr o Cyrene yng Ngogledd yr Affrig, yn ymweld â Jerwsalem i ddathlu Gŵyl y Bara Croyw. I Iddewon Jerwsalem ‘roedd Simon yn amhur. Er yn ŵr halogedig ac amhur yn nhyb yr Iddewon, dyma’r gŵr fu’n gymorth i Iesu. Pwyslais Marc yw bod Iesu wedi derbyn cymorth gan yr ymylol, a bod yr estron - y canwriad (Marc 15:39) - wedi cydnabod ei fawredd. Rhaid i’n crefydd ledu ein gorwelion; rhaid i’n crefydda ymagor i gynnwys yr ymylol, ac i groesawu’r estron.

Ac am dri o’r gloch gwaedodd Iesu â llef uchel, "Eloï, Eloï, lema sabachthani" (Marc 15:34). Gellid awgrymu fod Iesu wedi colli ymdeimlad o agosrwydd Duw ei Dad. I Iddewon y cyfnod, hyddysg yn y Salmau, byddai neges Iesu yn gwbl amlwg iddynt: mae troad yng nghynffon y Salm: Molwch ef, chwi sy’n ofni’r Arglwydd ... ni ddirmygodd na diystyru gorthrwm y gorthrymedig ... Bydd yr anghenus yn bwyta, ac yn cael digon a’r rhai sy’n ceisio’r Arglwydd yn ei foli. Bydded i’w calonnau fyw byth! (Salm 22: 23-26). Nid gwaedd o anobaith sydd gan Iesu, ond cadarnhad o’i ffydd yn Nuw. Dyna neges ganolog y Salm; ond lle mae’r llawenydd?

... rhoes Iesu lef uchel, a bu farw. Rhwygwyd llen y Deml yn ddwy o’r pen i’r gwaelod (Marc 15:38, 39). Wrth i’r wahanlen a oedd yn cuddio'r Cysegr Sancteiddiolaf rwygo agorir ffordd ddirwystr i bresenoldeb Duw. Rhwygwyd y wahanlen rhyngom ni a’n hunain; rhwng eglwysi; rhwng pobl ffydd; rhwng cenedlaethau, hiliau, diwylliannau a chenhedloedd. Dyna’r llawenydd! Ymhlyg yn y llawenydd mae cyfrifoldeb. Ceir sawl grym ar waith yn brysur a dygn gyfannu’r rhwyg. Hawdd peidio ymwneud â hyn oll; peidio sôn am gyfrifoldeb a dyletswydd! Mae'r cyfnod hwn y'n ganwyd iddo yn galw arnom i sicrhau, gyda Duw, gyda’n gilydd, gyda’r estron na fydd y wahanlen byth eto’n gyfan.

Diolch am fendithion y Sul, cwmni’n gilydd yng nghwmni Duw.

PREGETH NOS SUL

Y Flwyddyn 70 ac Efengyl Marc (8): Rhwygo’r Wahanlen (Marc 15: 21; 3-41)

Efengyl Marc a ysgrifennwyd gyntaf adeg cwymp Jerwsalem. Wedi cwymp Jerwsalem, dim ond y Phariseaid a’r Iddewon Cristnogol oedd ar ôl. Mynnai’r Phariseaid mai canlyniad esgeulustod y bobl o ofynion Cyfraith Duw oedd cwymp Jerwsalem. Mynnai’r Iddewon Cristnogol mai canlyniad esgeulustod y bobl o neges Cyfraith Duw - neges cariad Iesu Grist - oedd dinistr y Deml. Beth yw arwyddocâd hyn oll i ni fel eglwysi, ac i grefydd a chrefydda yng Nghymru?

Yna aethant ag ef allan i’w groeshoelio. Gorfodasant un ... Simon o Cyrene, tad Alexander a Rwffus, i gario ei groes. (Marc 15: 20-21) Wrth i Iesu grymu dan ei groes daeth Simon o Cyrene i’w gynorthwyo; gwr o Cyrene yng Ngogledd yr Affrig, yn ymweld â Jerwsalem i ddathlu Gŵyl y Bara Croyw. I Iddewon Jerwsalem ‘roedd Simon yn amhur. Heb sôn am ei dad, fe’i cyflwynir fel tad Alexander a Rwffus. Enw Groegaidd yw Alexander, ac mae Rwffus yn enw Rhufeinig. I’r Phariseaid, ‘roedd hyn yn arwydd mai person halogedig ydoedd. Ar y llaw arall, mae Simon, enw traddodiadol, diogel Iddewig yn awgrymu magwraeth Iddewig. Roedd Simon yn Iddew o argyhoeddiad. Er yn ŵr halogedig ac amhur yn nhyb yr Iddewon, dyma’r gŵr fu’n gymorth i Iesu. Pan welodd y canwriad, a oedd yn sefyll gyferbyn ag ef, mai gyda gwaedd felly y bu farw, dywedodd, "Yn wir, Mab Duw oedd y dyn hwn." (Marc 15:39). Sylwer, er mai’r Rhufeiniaid fu’n gyfrifol am ddinistrio’r Deml, y gelyn a wêl Iesu fel Mab Duw. Pwyslais Marc yw bod Iesu wedi derbyn cymorth gan yr ymylol, a bod yr estron wedi cydnabod ei fawredd. Rhaid i’n crefydd ledu ein gorwelion; rhaid i’n crefydda ymagor i gynnwys yr ymylol, ac i groesawu’r estron. Yn 2016,’rydym ninnau mewn cyfnod lletchwith. Rhaid peidio cau a chloi’r drws rhag y byd; nid yn unig y mae hynny yn eu cau ‘nhw’ allan, ond mae hefyd yn ein cau ninnau i mewn. Yn y gyfres Hitchhiker’s Guide to the Galaxy gan Douglas Adams (1952-2001), darganfyddir tŷ gyda’r allanol tu mewn, a’r mewnol tu allan. Wedi croesi rhiniog y drws, mae’r byd i gyd oddi mewn i’r tŷ. Weithiau, er pob ymddangosiad, mae’r cyfan oll o’n cwmpas yn gysurus a chyfarwydd, a chrëir yr argraff ein bod ni’n ddiogel tu mewn. Ond na! Tu faes ydym! I gamu i mewn i fendith fawr ein ffydd, rhaid camu allan at Dduw, allan yn enw Duw, allan at, a thros bobl. Wrth gamu allan bydd ein profiad o Dduw yn lledu, ehangu a dyfnhau.

Ac am dri o’r gloch gwaedodd Iesu â llef uchel, "Eloï, Eloï, lema sabachthani" (Marc 15:34). Gellid awgrymu fod Iesu wedi colli ymdeimlad o agosrwydd Duw ei Dad. I Iddewon y cyfnod, hyddysg yn y Salmau, byddai neges Iesu yn gwbl amlwg iddynt: Fy Nuw, fy Nuw, paham y’m gwrthodaist? Paham yr ydwyt mor bell oddi wrth fy iachawdwriaeth, a geiriau fy llefain? (Salm 22:1) Cwyd Marc Iesu fel drych i’r bobl weld eu hunain: Y mae gyr o deirw o’m cwmpas, rhai cryfion yn cau amdanaf ... y mae fy nghalon fel cŵyr, ac yn toddi o’m mewn ... (Salm 22:12-14) Ond newidir cyfeiriad: Molwch ef, chwi sy’n ofni’r Arglwydd ... ni ddirmygodd na diystyru gorthrwm y gorthrymedig ... Bydd yr anghenus yn bwyta, ac yn cael digon a’r rhai sy’n ceisio’r Arglwydd yn ei foli. Bydded i’w calonnau fyw byth! (Salm 22: 23-26). Nid gwaedd o anobaith sydd gan Iesu, ond cadarnhad o’i ffydd yn Nuw. Dyna neges ganolog y Salm; lle mae’r llawenydd?

... rhoes Iesu lef uchel, a bu farw. Rhwygwyd llen y Deml yn ddwy o’r pen i’r gwaelod (Marc 15:38, 39). Wrth i’r wahanlen a oedd yn cuddio'r Cysegr Sancteiddiolaf rwygo agorir ffordd ddirwystr i bresenoldeb Duw. Iesu agorodd y ffordd, gan mai Iesu yw’r ffordd. Rhwygwyd y wahanlen rhyngom ni a’n hunain; rhwng eglwysi; rhwng pobl ffydd; rhwng cenedlaethau, hiliau, diwylliannau a chenhedloedd. Dyna’r llawenydd! Ymhlyg yn y llawenydd mae cyfrifoldeb. Ceir sawl grym ar waith yn brysur a dygn gyfannu’r rhwyg. Hawdd peidio ymwneud â hyn oll; peidio sôn am gyfrifoldeb a dyletswydd! Mae'r cyfnod hwn y'n ganwyd iddo yn galw arnom i sicrhau, gyda Duw, gyda’n gilydd, gyda’r estron na fydd y wahanlen byth eto’n gyfan.

OND

Mae cymydog i ni, beth bynnag a ddywedir wrthi, yn hoff o ddefnyddio dau air Yes, but ... Fe wyddech ei bod, er yr yes cadarnhaol, mewn gwirionedd yn anghytuno - mae'r but anorfod yn agor drws i lif ei barn hithau am hyn, llall ac arall; mae'r 'ond' yn newid y cwbl.

Mor hawdd, a chyson y llithra'r 'ond' - sy'n newid popeth - i'n sgwrs ninnau. 'Mae'r tŷ yn iawn ond ...'; 'Mae'r eglwys yn iawn ond ...'; 'Mae'n berson iawn ond ...' Mae'r 'ond' yn newid y cwbl.

Nid yn unig ei ddweud 'rydym; gall yr 'ond' fod ar waith yn ein byw a'n bod. Ys gwn i sawl un yng nghylch ein cydnabod sydd yn cario'i 'ond' yn ddewr a dirwgnach, ac o bosibl neb yn gwybod am hynny? Dim ond yr allanol a welwn ni'n aml, yr wyneb cyhoeddus, heb allu gweld loes a thorcalon yr 'ond'. 'Does dim rhyfedd i Iesu ein hannog i fod yn ofalus yn ein beirniadaeth o'n gilydd. (Peidiwch â barnu, rhag ichwi gael eich barnu; oherwydd fel y byddwch chwi'n barnu y cewch chwithau eich barnu, ac â'r mesur a rhowch y rhoi i chwithau. Mathew 7:1 BCN). Mae'r 'ond' yn newid y cwbl.

Fyddai neb byth yn caru'i gymydog fel ef ei hun pe bai'n gwrando ar bob 'ond' y gellid ei ddweud.

(OLlE)

ARFAU BENTHYG

Stori sydd wedi cydio yn nychymyg pob plentyn - a phobl hŷn - yw stori Dafydd a Goliath. Aeth Dafydd â bwyd i'w frodyr - milwyr ym myddin Saul. Tawel iawn oedd pethau yn y gwersyll gan fod Goliath yn eu herio i frwydr, a neb yn fodlon ymateb i'r her.

Pan glywodd Dafydd hyn, dywedodd y byddai ef yn fodlon derbyn yr her. Aed ag ef at Saul; 'roedd y brenin yn ddiolchgar, mor ddiolchgar nes rhoi i Dafydd ei arfwisg ei hun: ... rhoi helm bres ar ei ben, ei wisgo yn ei lurig, a gwregysu Dafydd â'i gleddyf dros ei wisg (1 Samuel 17:38). Y foment honno, 'doedd neb yng ngwersyll Israel wedi ei arfogi'r well ar gyfer brwydr na Dafydd. Ond, gwrthod y cyfan wnaeth Dafydd. Pam? Ni fedraf gerdded yn y rhain, oherwydd nid wyf wedi arfer â hwy (1 Samuel 17:39). Arfau benthyg oeddent.

Amhosibl yw ymladd brwydrau bywyd ag arfau benthyg. 'Roedd Dafydd wedi hen arfer â ffon dafl, a chyda honno yr aeth i gwrdd â'r cawr - honno a'i ffydd yn Nuw. Dyna pam fod pwyslais y Beibl yn gyson gyson ar ymateb personol mewn ffydd i Dduw, a'r ffydd bersonol honno, o'i gyson ymarfer, yn erfyn cyfarwydd yn ein dwylo i oresgyn cewri cas ein byw a'n profiad.

(OLlE)

PITSA A SEICLO NODDEDIG

Wedi dod ynghyd, o'r ieuengaf i'r hynaf; i ffwrdd â ni gan hamddenol gerdded, loncian, seiclo, sgwtro ... ac un - onid oes wastad un? (Mab y Gweinidog ydoedd!) - yn hamddenol ddigon ar ei sgwter trydanol! Yng nghanol prysurdeb cyfnos ar gaeau Pontcanna, cafwyd hwyl yng nghwmni'n gilydd. Wedi dychwelyd, â Cafe Castan bellach yn llawn o bobl eglwys Minny Street, rhannwyd pitsa ymhlith y plant a'r bobl ifanc, gyda'r addewid o beth bynnag oedd yn weddill i'r oedolion! Wedi'r pitsa, allan eto a gosod y Gweinidog yn y gôl. Er mawr syndod i rai, nid oedd hanner cynddrwg ar ddisgwyl fel gôl geidwad! Diolch i bawb a fu ynglŷn â'r trefnu, a'r cyfan oll er budd ein helusen eleni: Pedal Power. www.cardiffpedalpower.org

'BATTLE AT MAMETZ WOOD' - CHRISTOPHER WILLIAMS (1873-1934)

Ar y 7fed o Orffennaf 1916 dechreuodd brwydr gyntaf Coedwig Mametz ar y Somme. Erbyn y 12fed, lladdwyd ac anafwyd tua 4,000 o’r 38fed Llu (Cymreig). Gelwir y lle’n ‘Dyffryn y Cymry’ gan y Ffrancwyr lleol o hyd. Heddiw, gwelir y Ddraig Goch yn cyhwfan dros y lle bu cymaint o dywallt gwaed a gwastraff bywyd. Ymhlith y milwyr a brofodd o’r erchylltra oedd nifer o feirdd rhyfel allweddol Cymru a Lloegr, yn cynnwys Robert Graves (1895-1985); David Jones (1895-1974), Siegfired Sassoon (1886-1967) a Llewellyn Wyn Griffith (1890-1977).

Fe beintiwyd darlun o’r lladdfa – portread o gyflafan – gan Christopher Williams (1873-1934), darlun a welir yn yr Oriel Genedlaethol yng Nghaerdydd. Dyma felly Battle at Mametz Wood (1918):

Mae’r gweld a’r clywed yn aml iawn mewn perffaith gynghanedd, felly wrth syllu i ddyfnder gwewyr portread Christopher Williams o wir erchylltra rhyfela, gwrandawn apêl Wil Ifan (1883-1968):

Yr unfed awr ar ddeg 

Na ato Duw i neb farddoni

Ing y pedair blynedd hir,

A rhoi mentyll eu rhamantau

Dros ysgwyddau’r ffiaidd wir;

Os am gofio, cofiwn gofio’r

Cyfan oll yn llaid a gwaed,

A phob hawddgarwch ac anwyldeb

Wedi’u mathru’n faw dan draed.

Yr unig beth all gofio’r marw

Yw dagrau hallt ar ruddiau’r byw,

A churo dwyfron edifeiriol

A gweiddi am drugaredd Duw:

Os ceir ymbil yn lle ymffrost

A phader yn lle llw a rheg,

Pwy a ŵyr

Na all Ef ein hachub eto

Ar yr unfed awr ar ddeg?

Y Winllan Las (1936)

(OLlE)

YMCHWILIAD CHILCOT

Un o nodweddion ein cyfnod yw ymchwiliadau cyhoeddus. Cyhoeddir heddiw adroddiad hir-ddisgwyliedig ymchwiliad Chilcot i ran gwledydd Prydain yn rhyfel Irac. Gwyddom am ymchwiliad Butler - ynghylch cywirdeb y gudd-wybodaeth oedd yn honni bod arfau niwclear ac ati yn Irac. Cofir am ymchwiliad Hutton ynghylch marwolaeth Doctor David Kelly. Gwyddom hefyd am yr ymchwiliadau a fu oherwydd Harold Shipman, Stephen Lawrence, Victoria Climbie, Bloody Sunday, Rosmary Nelson, Robert Hamill, Billy Wright, Patrick Finucane, Baha Mousa, Shirley McKie. Mae’n anodd cadw fyny gyda’r holl ymchwiliadau hyn; a rywsut, mae’n anodd peidio meddwl y daw ymchwiliad ynghylch yr ymchwiliadau.

Diben pob ymchwiliad yw darganfod beth ddigwyddodd; darganfod y gwirionedd. Y bwriad yw ateb cwestiynau pwysig a difrifol. Gallwn ymfalchïo yn y chwilio am wirionedd a'r twrio am gyfiawnder, ond a ydym yn dysgu rhywbeth o gwbl o’r ymchwiliadau hyn? Mae’r cwestiynau sydd yn cael eu holi yn wirioneddol bwysig … ond efallai fod cael ein gweld yn holi’r cwestiynau wedi mynd yn bwysicach na chanfod yr atebion sydd angen arnom.

Ar ddechrau llyfr Genesis, gwelwn fod pawb wedi eu creu ar lun a delw Duw. Yr her i fi a chi yw darganfod delw Duw ynom ein hunain ac eraill. Dylid ymroi i chwilio am lun a delw Duw ynom ein hunain a phobl eraill.

Er mwyn cynorthwyo mudiadau a sefydliadau i newid a datblygu, mae arbenigwyr yn defnyddio dull arbennig o ymchwilio, sef AI, sef Appreciative Inquiry. Diben Appreciative Inquiry yw hybu rhinwedd, yn ogystal ag amlygu gwendid.

Dyma ffordd wahanol o ymchwilio. Gellid ei fabwysiadu gennym fel eglwysi, ac fel unigolion. Y cwestiwn sylfaenol yw hyn: Beth sydd dda, effeithiol a bendithlawn yn ein perthynas â ni'n hunain, ein perthynas ag eraill a'n perthynas â Duw?

Mae pawb yn hoffi cael eu canmol. Mae canmol yn tynnu’r gorau allan ohonom. Mae canmoliaeth hefyd yn creu gofod i bobl cael ymdrin yn gall ynghylch y pethau nad sydd mor fendithiol, effeithiol a da.

Meddyliwch am y bobl sydd yn rhannu eich bywyd: y plant, eich cymar, y teulu, cyfeillion, cymdogion, cyfoedion, cydweithwyr. Onid, haws yw gweld bai ynddynt na chanmol yr hyn sydd dda?

Wrth werthfawrogi pobl, ‘rydym hefyd yn chwilio am Dduw ar waith. Cawn weld, felly Duw ar waith yn a thrwy ein bywyd ni; bywyd y bobl sydd yn rhan o wead ein byw; a bywyd y gymdeithas ehangach o’n cwmpas.

Yn ei lythyr at yr Effesiaid mae Paul yn annog yr eglwys yno i gymhwyso’r saint i waith y weinidogaeth, i adeiladu corff Crist (Effesiaid 4:12). Mae gwerthfawrogi’r hyn sydd dda ynom, ac o’n cwmpas, yn ffordd wych o adeiladu corff Crist gan fod yr hyn sydd yn wan, aneffeithiol, niweidiol a drwg, yn cael ei amlygu - ni ddylid cuddio gwendidau na chelu trafferthion. Ond, mae’r hyn sydd dda, llesol, creadigol a chynhaliol yn cael ei osod mewn print bras, trwm a lliwgar.

Tybed, felly os gallwn gynnal ymchwiliad tawel ohonom ein hunain heddiw? A hynny trwy gyfrwng ystyriaeth addolgar o’r adnodau a thestunau gweddi isod.

Wrth ddarllen yr adnodau isod, ystyriwch gysgod amddiffynnol Duw drosoch, a gollyngwch eich hun i’w ofal ...

ARGLWYDD, yr wyt wedi fy chwilio a’m hadnabod ...

Chwilia fi O! Dduw, iti adnabod fy nghalon; profa fi, iti ddeall fy meddyliau. Edrych a wyf ar ffordd a fydd yn loes i mi, ac arwain fi yn y ffordd dragwyddol.

(Salm 139:1a, 23-24 BCN)

Dduw grasol, molwn di,

am dy gariad tuag atom,

am dy waith drosom

ac am dy nerth ynom.

• Gofynnwn am gael derbyn cyfoeth cariad y Tad ac i estyn y cariad hwnnw i eraill.
• Pura’n meddyliau o bopeth amhur a chyfeiliornus a ffurfia ynddynt dy feddwl sanctaidd di.
• Cod ein hewyllys o afael pob cymhelliad hunanol a hyffordda ni i ufuddhau i ofynion dy deyrnas.
• Rhyddha ein doniau o bob amcan annheilwng a pherffeithia hwy yn dy wasanaeth di.
• Achub ein heneidiau o’u caethiwed i bechod a glanha a sancteiddia hwy trwy rin dy gariad.
• Ffurfia ni’n gyfan gwbl ar batrwm dy berson a gad i’th fywyd di lenwi a ffurfio’n bywyd ni.

Amen.

(OLlE)

Y GWASANAETH IECHYD CENEDLAETHOL

Illness is neither an indulgence for which people have to pay, nor an offence

for which they should be penalized but a misfortune, the cost of which should be

shared by the community.

Aneurin Bevan (1897-1960)

Heddiw yn 1948, 'ganwyd' y Gwasanaeth Iechyd Cenedlaethol.

Gwyddom, Arglwydd, mai dy fwriad di yw i bob un ohonom fwynhau iechyd yn ei gyfanrwydd. Felly, yn llawn ffydd a hyder gweddïwn ar ran y rhai sy'n gweithio er iachâd a lles y gymuned.

Gweddïwn ar ran meddygon teulu sy'n dwyn cysur a chyngor i ni; am eu gwybodaeth a'u sgiliau a ddefnyddir yn anhunanol er ein lles.

Gweddïwn ar ran y rhai sy'n gweithio mewn ysbytai: meddygon o dan hyfforddiant, ymgynghorwyr, llawfeddygon, nyrsys a staff technegol.

Gweddïwn ar ran y rhai sy'n gweithio yn y cefndir: gwyddonwyr sy'n ymdrechu i goncro afiechydon, gweithwyr yn y labordai, a'r rhai sy'n cynhyrchu ac yn dosbarthu cyffuriau angenrheidiol.

Gweddïwn dros bobl ifanc sydd dan hyfforddiant i fod yn feddygon a nyrsys, gan ofyn i ti eu cynysgaeddu â doethineb, medr a chydymdeimlad a'u harwain i ddefnyddio'u doniau yn dy wasanaeth, ac er iechyd a lles eu cyd-ddynion.

Gweddïwn dros y rhannau hynny o'r byd lle mae gwasanaeth meddygol yn brin. Symbyla ni i fod yn ofalus o'r gwasanaeth sydd gennym, ac yn hael ein hymateb i angen y rheini sydd heb y cyfleusterau a gymerwn ni yn ganiataol. Amen.

Addasiad o weddi gan Donald Hilton (552; Gweithwyr Meddygol) allan o 'Amser i Dduw. Trysorfa o weddïau hen a newydd', gol. Elfed ap Nefydd Roberts;  Cymdeithas Lyfrau Ceredigion Gyf 2004.