Your Custom Text Here
A hithau’n ddiwrnod godidog o Wanwyn ac yn dilyn coffi yng nghaffi Pedal Power, ein helusen am eleni, cafwyd taith gerdded hyfryd drwy gaeau parc Bute. Braf oedd gweld llawer o bobl ifanc yng nghwmni caredigion yr elusen yn beicio’n hapus a diofal ar hyd llwybrau’r Parc.
Fel y bardd teimlem fod dyfodiad
‘...myrdd o flodau mwyn
A naws gynnes y gwanwyn
Yn rhoi balm ar friwiau’r byd.’
(J.R. Jones, Rhwng Cyrn yr Arad’, Llyfrau’r Dryw, 1962 t.33)
Enghreifftiau o feiciau arbennig Pedal Power
Sant y Gwyddyl - Padrig (c.389-461)
Padrig Sant; ffenest lliw yn Eglwys Benin Sant, Kilbennan, Swydd Galway, Iwerddon.
Sylwch ar y meillionen. Defnyddiai Padrig y meillionen fel darlun o Dduw: Tad yn creu, Mab yn gwaredu, Ysbryd yn cynnal - Duwdod, Undod, Trindod.
Daw'r weddi isod o 'Lurig Padrig' a gyfansoddwyd yn yr wythfed ganrif:
Grist bydd gyda mi, Crist o'm mewn,
Crist y tu cefn i mi, Crist y tu blaen i mi,
Crist gerllaw imi, Crist i’m hennill i,
Crist i’m cysuro a’m hadfywio,
Crist o danaf Crist uwch fy mhen,
Crist mewn llonyddwch, Crist mewn perygl,
Crist yng nghalonnau pawb sy’n fy ngharu,
Crist ar wefus ffrind neu ddieithryn. Amen
19 Mawrth 2014: ‘Roedd ganddo newyddion da: ei gerddediad yn sionc, ei wen yn fawr ac ysgafn. ‘Roedd ei osgo’r dydd Mercher hwnnw yn ymgorfforiad o hyder - hyder newydd - hyder na welwyd mo’i debyg ers yn hir, rhy hir.
16 Mawrth 2016: Nid da'r newyddion heddiw, a'i gerddediad felly'n arafach, a'i wen yn drwm braidd. ‘Roedd ei osgo yn ymgorfforiad o ofid - hen ofid - nid oedd pethau cystal ag y dymunai, ac 'roedd yn rhaid cydnabod hynny.
19 Mawrth 2014
19 Mawrth 2014: Trafodai’r Canghellor ei filiynau a’i bilynnau yn sionc a llon. Neges y gyllideb honno oedd bod llywodraeth gyfredol San Steffan, gyda mawr sêl a chryn ofal, wedi llwyddo i godi’r economi ar ei thraed. Dim rhagor o fygythion a rhybuddion ailadroddus, ailadroddus, ailadroddus! Daeth dyddiau gwell, a gwell dyddiau eto’i ddod!
16 Mawrth 2016
16 Mawrth 2016: Trafodai’r Canghellor ei filiynau a’i bilynnau yn lleddf ofalus. Neges y gyllideb heddiw yw bod llywodraeth gyfredol San Steffan, gyda chryn ofal a mawr sêl, heb lwyddo - hyd yn hyn - i godi’r economi ar ei thraed. Daeth rhagor o fygythion a rhybuddion - rhaid wrth doriadau pellach; gwerth £3.5bn ohonynt. Daw dyddiau gwell; daw cyllideb gwarged yn 2020. Rhaid wrth gyllideb gwarged yn 2020!
19 Mawrth 2014: ‘Roedd Etholiad Cyffredinol yn prysur agosáu, ac ‘roedd y Canghellor am i bobl sylweddoli dau beth; yn gyntaf mae ei blaid yntau oedd wedi llywio a lliwio’r adferiad hwn. Yn ail, rhaid i bobl barhau i ymddiried yn y llywodraeth os oeddent am weld yr adferiad yn parhau; wedi’r cyfan, peth bregus yw’r economi, bregus iawn.
16 Mawrth 2016: Mae Refferendwm Ewrop yn prysur agosáu. Mae Mehefin 23ain yn destun ymrafael, os nad ymrannu i’r blaid Dorïaidd. Nid oedd y Canghellor o blaid cynnal Refferendwm. Credodd, y buasai pleidlais agored yn siglo’r economi ac yn hollti’r blaid y buasai’n dda ganddo, efallai, cael cyfle i’w harwain yn y dyfodol. Mynnodd y Prif Weinidog cynnal Refferendwm. Bydd colli’r dydd ym Mehefin, yn golygu fod Mr Cameron yn colli safle fel arweinydd, ac ... Mr Osborne yn colli cyfle i fod yn arweinydd. Mehefin 23, a Chyllideb 2020 - gyda’r naill beth a’r llall mewn golwg, ‘roedd y Canghellor am i bobl sylweddoli dau beth heddiw; yn gyntaf mae dim ond ei blaid yntau allasai llywio a lliwio’r adferiad yr economi. Yn ail, rhaid i bobl barhau i barhau i ymddiried yn y llywodraeth os oeddent am weld adferiad economaidd; wedi’r cyfan, peth bregus yw’r economi; llawn mor fregus â gyrfa wleidyddol.
19 Mawrth 2014: Nid oedd hyder byrlymog y Canghellor a Llywodraeth San Steffan mewn cynghanedd â phrofiad bywyd y trwch sylweddol o bobl eu gofal. Cyhoeddwyd parti gyda’r Gyllideb honno, ond nid pawb oedd â gwahoddiad.
16 Mawrth 2016: Mae gofid amlwg y Canghellor a Llywodraeth San Steffan yn adlewyrchiad o ofid pobl eu gofal. Mae Prydain sionc, hyderus llon Cyllideb 2014 yn bodoli, ond yn bodoli wrth ei hochr mae Prydain y Banciau Bwyd. Beth bynnag arall yw gwaith Llywodraeth, rhaid iddi warchod pawb nid dim ond y llewyrchus eu byw a dedwydd eu byd. Gwarchod pawb yw’r unig ddiogelwch, a’r unig lwyddiant i ymgyrraedd ato.
(OLlE)
Heno, "Cipolwg Cerddwr" yng nghwmni Gareth Pierce, Caerfyrddin. Cawsom gipolwg teuluol, cofiannol, barddonol, darluniadol, chwedlonol, naturiaethol - 'cipolwg' eang a thra diddorol. Diolch am noson fuddiol a braf, yn glo teilwng i'r tymor llewyrchus hwn. Mawr ein diolch i aelodau'r pwyllgor am ei gwaith, ac i bawb am eu cefnogaeth a chwmnïaeth.
Edrychwn ymlaen i'r Cinio Pen Tymor, nos Fawrth, Mawrth 29 yng Nghlwb Golff yr Eglwys Newydd am 7 o'r gloch. Y gwestai fydd ein cyd-aelod, Alun Guy.
Mileva Marić a Albert Einstein
Y dydd heddiw, yn 1879 ganed Albert Einstein (m.1955).
Meddai Mileva Marić (1875-1948), ei wraig gyntaf: "Dwi ddim yn deall damcaniaethau Dr. Einstein, ond, dwi’n deall Albert.”
Nid digon edmygu Crist. Nid delfryd aruchel tu hwnt i'n cyrraedd mohono. Iesu byw; agos, agos ydyw. Iesu heddiw - gyda ni.
Gwell adnabod Iesu na’i edmygu o bell.
(OLlE)
Ar ôl hyn, amlygodd Iesu ei hun unwaith eto i’w ddisgyblion, ar lan Môr Tiberias...‘Dewch,’ meddai Iesu wrthynt, cymerwch frecwast.’...a chymerodd y bara a’i roi iddynt, a’r pysgod yr un modd. (Ioan 21:1,12,13)
Llun: Itay Bav-Lev
'Tiberias' ...
Ie, bychan y cwmni ond mawr y fendith â’r tri ohonom yn dechrau’r dydd mewn gweddi, myfyrdod a defosiwn.
Ers dechrau ym mis Medi 2015, buom o fis i fis yn dawel ystyried gweddïau’r Beibl. Yn y ‘Tiberias’ cyntaf (14/9) gweddi Abraham (Genesis 18:23-33) oedd testun ein sylw; gweddi Hanna (1 Samuel 1:9-18, 24-28) yn yr ail gyfarfod (12/10); gweddi Solomon (1 Brenhinoedd 3:3-15; 16/11). Ym mis Rhagfyr, echel ein myfyrdod oedd gweddi Heseceia (2 Brenhinoedd 19:8-19). Ym mis Ionawr (4/1) gweddi Jona (Jona 2), a gweddi Jeremeia (17:14-18) fu gwrthrych ein myfyrdod ym mis Chwefror (1/2). Heddiw, proffwydi Baal a phroffwyd yr ARGLWYDD yn gweddïo (1 Brenhinoedd 18:21-40).
Rhaid craffu ar y cyferbyniad rhwng gweddïau proffwydi Baal ar fynydd Carmel a gweddi Elias. Gweddïodd proffwydi Baal arno o’r bore hyd hanner dydd: Baal, ateb ni. Ond nid oedd llef nac ateb, er iddynt lamu o gylch yr allor. Yna bu’n rhaid iddynt ddawnsio’n wyllt, ac anafu eu hunain â chyllyll a phicellau nes i’r gwaed lifo arnynt. Ond nid thyciau hynny ddim. Felly parhasant i broffwydo’n orffwyll hyd yr hwyr ond nid oedd llef nac ateb na sylw i’w gael.
O’i chyferbynnu â’r gweddïau i Baal, ‘roedd gweddi Elias i’r ARGLWYDD, Duw Abraham, Isaac ac Israel, yn un ddisgybledig a ffyddiog, ond yn daer ar yr un pryd: ... pâr wybod heddiw mai ti sydd Dduw yn Israel, a minnau’n was iti, ac mai trwy dy air di y gwneuthum hyn i gyd. Ateb fi, O! ARGLWYDD, ateb fi, er mwyn i’r bobl hyn wybod mai tydi sydd Dduw, ac mai ti sydd yn troi eu calon yn ôl drachefn.
Ar brydiau tueddwn ninnau i ymddwyn fel proffwydi Baal gan geisio creu argraff ar Dduw a’i bobl trwy ryw ffordd neu arddull, neu dechneg o weddi. Dylem yn hytrach bwyso ar addewid Duw i wireddu’i Air. Yn ein pryder am lwyddiant ceisiwn greu tân o’r nef i argyhoeddi pobl a’u hennill. Nid felly y daw. Fe ddaw pa ymrown yn gyfan i’n Harglwydd ac ymddiried yn ei allu. Canys fel hyn y dywed yr ARGLWYDD Dduw, Sanct Israel ... mewn llonyddwch a gobaith y bydd eich cadernid ... (Eseia 30:15 WM).
 ninnau'r bore hwn, wedi myfyrio uwchben gweddïau proffwydi Baal a gweddi Elias, edrychwn ymlaen at gyfle i drafod gweddi Iesu yng ngardd Gethsemane (Luc 2:22-38) yn ‘Capernaum’ nos Lun 21/3.
Aled Pickard yn arwain yr Oedfa Foreol Gynnar
Pythefnos Masnach Deg: o 29 Chwefror 2016 i 13 Mawrth 2016
'Steddwch am frecwast; sefwch am ffermwyr
Cymerodd Eglwys Minny Street y cam o gofrestru fel Eglwys Masnach Deg mewn Cwrdd Eglwys a gynhaliwyd ar Nos Sul, 5 Rhagfyr 2004. Bu’r eglwys yn weithgar yn yr ymgyrch hon ers nifer o flynyddoedd cyn hynny ond dros y degawd diwethaf sicrhaodd mai dim ond nwyddau Masnach Deg/Fairtrade a ddefnyddir ym mhob agwedd o waith yr eglwys, bu’n cymryd rhan mewn nifer o ymgyrchoedd Masnach Deg, a bu’n hyrwyddo ystod eang o nwyddau sydd bellach yn cario label Masnach Deg.
Ychydig o'r nwyddau Masnach Deg
... a rhagor!
Mewn arolwg diweddar canfuwyd bod 78% o boblogaeth gwledydd Prydain yn adnabod logo Masnach Deg/Fairtrade. Yn wir, cyfrifir y logo, y label moesol mwyaf cyfarwydd yn ein plith. Yn anffodus, cyfaddefodd dros 50% o’r rhain nad oedd ganddynt y syniad lleiaf beth oedd arwyddocâd y logo, na chwaith pam y dylent fod yn prynu nwyddau yn arddel y label. Yn fwy siomedig oedd bod nifer o’r atebwyr hyn yn Gristnogion. Mae’n amlwg bod gennym fel Cristnogion ffordd bell i fynd i ddarbwyllo nid yn unig ein cyd-ddinasyddion ond hefyd ein cyd-Gristnogion o’n dyletswyddau tuag at ein cyd-ddyn.
Er bod sawl un o’r archfarchnadoedd bellach yn gwerthu nwyddau Masnach Deg, megis te, coffi siocled a bananas, teg dweud bod llawer o’r cynhyrchwyr teuluol a gwledig yn dibynnu ar siopau bychain ar y Stryd Fawr i werthu eu nwyddau trwy fudiad Fairtrade. Un o’r siopau hynny yw Fair Dos/Siopa Teg, ar Heol Llandaf, Treganna. Mae gan y siop hon gysylltiad agos ag Eglwys Minny Street; mae’n cefnogi cynhyrchwyr bychain trwy werthu nwyddau Fairtrade a hefyd archebu nwyddau megis crefftau a chardiau cyfarch Cymraeg yn uniongyrchol o gynhyrchwyr yn Affrica.
Cawsom glywed am ‘Cardiau o Affrica’ o Rwanda, a ‘Crefftau Denur’ o Kenya yn ein Hoedfa Foreol Gynnar. Mawr ein diolch am gwmni ac arweiniad Aled Pickard. Bu Aled yn sôn am ei waith yn ceisio mesur effaith prynu dim ond un eitem Masnach Deg. Syfrdanwyd y gynulleidfa o sylweddoli mor real a phell gyrhaeddol y cymorth a ddaw yn sgil penderfynu prynu darn o waith crefft neu gerdyn cyfarch Masnach Deg. Meddai Leah Mitula, sylfaenydd ‘Crefftau Denur’: Efallai nad ydych yn ystyried y gwahaniaeth ‘rydych chi’n ei wneud. Mae eich siopa wedi gwneud gwahaniaeth mawr i blant yn Kenya a gwerthfawrogir y cyfan yn fawr iawn.
Beth felly yw nod Masnach Deg? Yn syml, ceisio cynnig rhwyd ddiogelwch i gynhyrchwyr trwy warantu, yn gyntaf, isafswm pris y cytunwyd arno’n rhyngwladol. Os yw’r pris ledled y byd yn codi, yna codi hefyd y mae’r pris Masnach Deg, ond mae’r pris Masnach Deg yn aros yn sefydlog os yw pris y farchnad yn gostwng Yn ail, premiwm cymdeithasol i fuddsoddi mewn datblygu cymunedol megis ffynhonnau neu glinigau. Mae’n rhaid i gynhyrchwyr fod yn rhan o gorff democrataidd megis menter gydweithredol, er mwyn iddynt allu gwneud penderfyniadau ynghylch hyn mewn modd teg. Yn drydydd, amodau gwaith diogel a theg, ac yn olaf, dulliau cynhyrchu sy’n gyfrifol a chynaliadwy o safbwynt amgylcheddol. Sut fedrwn ni beidio cefnogi’r fath ymgyrch?
Y brecwast
Bwrlwm y brecwast Masnach Deg
Rhwng y ddwy oedfa foreol, cynhaliwyd Brecwast Masnach Deg: gwledd o frecwast a chyfle euraid i flasu a phrofi’r newydd - jam hibisgws a the Chai! Mae ystod cynnyrch Masnach Deg yn syfrdanol. Wedi’r brecwast a’i sgwrs, prysurdeb y stondin Masnach Deg (y dewis yn helaethach o dipyn heddiw wrth gwrs); cyfrannu i Fanc Bwyd Caerdydd, daeth 10:30, a’i gyfle newydd i addoli, gan ddechrau yn sŵn Salm 85:8-11 a’r weddi syml, dreiddgar: F’Arglwydd Iesu Grist, fab Duw, Waredwr, bydd drugarog wrthyf.
Thema pregethau’r Grawys eleni yw ‘Ffydd a Thrais’, ac yn yr Oedfa Foreol cydiwyd yn CONTEST - strategaeth gan Lywodraeth San Steffan fel ymateb i fygythiad brawychiaeth. Ceir iddi bedair ongl: Pursue, Prevent, Protect, Prepare … ymlid pob bygythiad, gweithredu i atal ymuno â mudiadau terfysg, cynnal a datblygu'r hyn sydd yn ein hamddiffyn a pharatoi ar gyfer ymosodiad. Hanfod y bregeth hon oedd yr alwad sydd arnom fel cymunedau ffydd i ymlid, atal, amddiffyn a pharatoi.
Bu ein cyfnod yn drwm o sôn am ddiogelu’r amgylchfyd, a dileu tlodi, anghyfartaledd, trais, rhyfel a therfysg. Erys y pethau hyn. Cuddiwn ein diffyg pendantrwydd, diffuantrwydd a dal-i-fyndrwydd o dan haenau o siarad, addewidion a bwriadau da. Try teimlad yn ddim amgenach na sentiment! Rhaid ymlid y sentimental.
Pa gymdeithas all magu’r dinasyddion sydd eu hangen ar ein gwlad a’n byd? Cymdeithas o gyd-addolwyr. Y gymdeithas hon a sicrha’r fagwrfa orau i bersonoliaeth rydd, ond cyfrifol. Rhaid atal pobl rhag cefnu arni.
Bloeddia’r penawdau trais a llofruddiaeth, rhyfel a therfysgaeth. Mae ofn arnom; mae ofn yn creu trais. Yr unig amddiffyn i ofn yw gobaith. Peidiwch ag ofni (Luc 2: 11) yw neges ein ffydd. ... mae perffaith gariad yn bwrw allan ofn (1 Ioan 4: 18).
Mewn bywyd daw gofid, diflastod, unigrwydd a thorcalon. Ni ellir osgoi'r rhain ond gellir paratoi i wynebu eu canlyniadau a’u goblygiadau. Mae angen unigolion a chymunedau ffydd sy’n barod i wylo gyda’r rhai sy’n wylo (Rhufeiniaid 12:15b) ... y ffoadur, y tlawd, yr amddifad a’r galarus.
Yn yr Oedfa Hwyrol, daeth y gyfres Grawys i ben gydag ystyriaeth o’r adnodau rhain o’r Llythyr at yr Hebreaid: Unwaith eto yr wyf fi am ysgwyd nid yn unig y ddaear ond y nefoedd hefyd". Ond y mae’r geiriau, ‘Unwaith eto’, yn dynodi bod y pethau a siglir, fel pethau wedi eu creu, i gael eu symud, er mwyn i’r pethau na siglir aros (Hebreaid 12: 26-27). Cyfaddefodd ein Gweinidog nad geiriau cysurlawn mohonynt, ond mynnai fod cymorth ac arweiniad ymhlyg ynddynt.
Duw sydd yn ysgwyd. Nid oes unrhyw ymgais i sentimentaleiddio Duw yn y Llythyr at yr Hebreaid. Nid Duw meddal mohono: Duw sydd yn ysgwyd pobl a byd yw hwn! Ysgwyd y cyfan oll, i bwrpas - symud y pethau a siglir, er mwyn i’r pethau na siglir aros. Allweddol bwysig yw’r pethau na siglir; wrth y rheini y dylem lynu. Rhain yw sylfaen y deyrnas ddi-sigl.
Awgrymodd ein Gweinidog tri pheth na siglir mohonynt. Natur ddigyfnewid Duw. Mae Duw yn gyson. Duw y cariad nad yw’n oeri, Tad y gras nad yw’r lleihau (George Rees, 1873-1950; C.Ff. 586). Iesu Grist, yr un ydyw ddoe a heddiw ac am byth (Hebreaid 13:7).
Yr Eglwys: ... ar y graig hon yr adeiladaf fy eglwys, ac ni chaiff holl bwerau angau y trechaf arni (Mathew 16: 18). Weithiau bu hon yn ddewr, ond nid pob amser! Weithiau, bu farw mewn cywilydd, llwch a baw. Bob tro, daeth bywyd newydd iddi oherwydd bod yr Hwn sydd ei phiau yn gwybod Ei ffordd allan o bob bedd.
Duw cariad yw (1 Ioan 4:8); tri gair yn warant o’n parhad. Wrth edrych ar y byd a’i phobl, ai posibl dychmygu creu rhywbeth mor anhygoel o gymhleth a phrydferth, dim ond i’w weld yn cael ei ddinistrio? O fethu dychmygu’r fath beth, sut ellir credu y gall Duw greu rhyfeddod yr hyn oll ydym, dim ond i’w weld yn darfod. O’n blaenau, mae Sul y Pasg, pryd y gwelwn gan fy mod yn fyw, byw byddwch chwithau hefyd (Ioan 14:19) - nid y bywyd hwn yw’r cyfan o fywyd.
Pan ysgydwir ein ffydd, ein diwylliant a’n crefydda, glynwn wrth y tri pheth hyn: mae Duw yn ddigyfnewid yn ei gariad; er iddi farw, nid marw bydd Eglwys Iesu Grist; a gan fod Iesu’n fyw, byw fyddwn ninnau hefyd.
Da a buddiol fu’r gyfres hon. Diolch amdani.
Bu i’r gymdeithas barhau yn Koinônia: swper blasus a sgwrs ddifyr mewn bwyty Eidalaidd cyfagos.
Diolch am amrywiol fendithion y dydd.
Edrychwn ymlaen at gael croesawu’r Parchedig Ddr. Noel Davies yn ôl i’n plith bore Sul nesaf. Â hwythau’n cynnal ei gŵyl bregethu flynyddol, ein braint fel eglwys nos Sul, fydd cael ymuno â’n brodyr a chwiorydd yn y Tabernacl, Caerdydd i wrando neges y Parchedig Ddr. Densil Morgan. Gweddïwn am wenau Duw ar y Sul.
Grawys 2016: Ffydd a Thrais 6: Hebreaid 12: 25-29 a Datguddiad 21: 1-4
Yn y gyfres deledu Civilization bu Kenneth Clarke (1903-1983) yn trafod dirywiad y diwylliant Ewropeaidd, dinistr Rhufain a dechrau’r Oesoedd Tywyll. Meddai: In the last few years, we’ve developed an uneasy feeling this could happen again ... advanced thinkers have begun to ask if our civilization is worth saving. Cofnoda Arnold J. Toynbee (1889-1975) yn ei Study of History ddatblygiad, ffyniant, dirywiad a diflaniad 19 diwylliant. Yn 2016, mae diwylliant y Gorllewin yn crebachu ac, yn ôl y sôn, yn raddol ddarfod. Ychwanegwn at y bygythiad mewnol, fygythiad allanol: mudiadau ffwndamentalaidd sydd am lenwi’r gwacter a grëir pan gwymp diwylliant. A oes gair oddi wrth yr Arglwydd? (Jeremeia 37: 17). Nid chynnig un gair oddi wrth Dduw ffordd allan nac i osgoi hyn oll; mae gennym air oddi wrth yr Arglwydd a’n harwain trwy hyn i gyd.
Unwaith eto yr wyf fi am ysgwyd nid yn unig y ddaear ond y nefoedd hefyd". Ond y mae’r geiriau, ‘Unwaith eto’, yn dynodi bod y pethau a siglir, fel pethau wedi eu creu, i gael eu symud, er mwyn i’r pethau na siglir aros (Hebreaid 12: 26-27). Er nad yn eiriau cysurlawn, ymhlyg ynddynt mae cymorth ac arweiniad. Ynddynt, ceir crynhoad o ddylanwad bywyd Iesu. Diben y cyfan oedd creu o’r hen fyd, byd newydd. Sut y crëir daear newydd o hen fyd? Ysgwyd Duw yr hyn oll a ellir ei ysgwyd, er mwyn amlygu’r hyn na ellir ei ysgwyd. O’r rhain, adeiladir o hen fyd, daear newydd. Y pethau na siglir yw deunydd crai y Nef Newydd a’r Ddaear Newydd (Datguddiad 21: 1-4).
yr wyf fi am ysgwyd: Duw sydd yn ysgwyd. ’Rydym yn argyhoeddedig mai Duw ar waith yw ein Duw. Hawdd derbyn y syniad o Dduw ar waith yn cynnal a chadw, ond Duw yn ysgwyd? Oni pan welir pethau’n ysgwyd o’n cwmpas y gwyddom fod Duw ar waith?. Siglwyd Abraham a Sara ... Moses ... ar ôl cyrraedd Canaan, crëwyd o’r Gyfraith, cyfreithiau, adeiladwyd dinas a chodwyd teml ... ac ysgydwwyd y cyfan. Siglwyd y cyfan er mwyn symud y pethau a siglir, ac i’r pethau na siglir aros. Daeth Iesu; ysgydwodd hwn y byd! Hoeliwyd ef i’r Groes ac yn gelain, gosodwyd ef i orwedd mewn bedd. Ysgydwodd Ei hun yn rhydd o’r bedd; diflannodd o fyw i farw, daethom ninnau i fyw i farw ac i fyw o’r newydd.
Mae tri pheth na siglir mohonynt. Natur ddigyfnewid Duw: ... y mae ef yn aros yn ffyddlon, oherwydd ni all ef ei wadu ei hun (2 Timotheus 2:13). Mae Duw yn gyson. Duw y cariad nad yw’n oeri, Tad y gras nad yw’r lleihau (George Rees, 1873-1950; C.Ff. 586). Iesu Grist, yr un ydyw ddoe a heddiw ac am byth (Hebreaid 13:7).
Yr Eglwys: ... ar y graig hon yr adeiladaf fy eglwys, ac ni chaiff holl bwerau angau y trechaf arni (Mathew 16: 18). Weithiau bu hon yn ddewr, ond nid pob amser! Weithiau, bu farw mewn cywilydd, llwch a baw. Bob tro, daeth bywyd newydd iddi oherwydd bod yr Hwn sydd ei phiau yn gwybod Ei ffordd allan o bob bedd. Yn 2016 darogan ystadegau ein diwedd. O gredu yn yr Atgyfodiad na ofynnwn: ‘A fydd yr eglwys yn goroesi er gwaethaf pob tystiolaeth ei bod yn darfod?’ ond, yn hytrach, ‘A ydym yn credu, a’r eglwys wedi darfod, y daw atgyfodiad: ffurf newydd - gwefreiddiol, a chreadigol - Gymreig ohoni?’ Daw llewyrch ar ein gweinidogaeth a’n cenhadaeth o ofyn yr ail gwestiwn; trwy wneud hyn dangoswn i ni ddeall fod Duw yn symud y pethau a siglir ... er mwyn i’r pethau na siglir aros.
gan fy mod yn fyw, byw byddwch chwithau hefyd (Ioan 14:19): cyfraniad pennaf ein ffydd yw nid gwneud bywyd heddiw yn haws, ond amlygu nad y bywyd hwn yw’r bywyd i gyd. Duw cariad yw (1 Ioan 4:8); tri gair yn warant o’n parhad. Wrth edrych ar y byd a’i phobl, ai posibl dychmygu creu rhywbeth mor anhygoel o gymhleth a phrydferth, dim ond i’w weld yn cael ei ddinistrio? O fethu dychmygu’r fath beth, sut ellir credu y gall Duw greu rhyfeddod yr hyn oll ydym, dim ond i’w weld yn darfod. O’n blaenau, mae Sul y Pasg, pryd y gwelwn gan fy mod yn fyw, byw fyddwch chwithau hefyd - nid y bywyd hwn yw’r cyfan o fywyd. Pan ysgydwir ein ffydd, ein diwylliant a’n crefydda, glynwn wrth y tri pheth hyn: mae Duw yn ddigyfnewid yn ei gariad; er iddi farw, nid marw bydd Eglwys Iesu Grist; a gan fod Iesu’n fyw, byw fyddwn ninnau hefyd.
