Oedfaon y dydd yfory dan arweiniad y Parchedig Jeff Williams.
09:30 Oedfa Foreol ac Ysgol Sul (Darpariaeth Zoom); Oedfa Hwyrol am 18:00
Dewch/ymunwch â chroeso. Boed bendith.
EIN SIOE FFASIWN
Noson hynod lwyddiannus i godi arian i Huggard, Banc Bwyd Caerdydd a Cwtsh. Diolch i’r pedair model. Diolch enfawr i Calon Rhiwbeina ag i Jean Salisbury am gyd-lynu'r cyfan.
YR IESU A WYLA
Wythnos yn ôl (14/10) nodwyd pen-blwydd y danchwa ym Mhwll yr ‘Universal’ yn Senghennydd (1913): lladdwyd 439 o bobl. Heddiw, nodir treigl 56 mlynedd ers llithro rhan o’r domen lo yn Aberfan, a dinistrio tai a chladdu rhan o Ysgol Pant-glas. Lladdwyd 116 o blant a 28 o oedolion.
CAFFI CELF #3
Bore heddiw, Caffi Celf: 'Atgyfodiad’ Alma Thomas ac Anneke Kaai; y Crist Cosmig gan Marian Bohusz-Szyszko; ‘Room for Hope’ gan Seyed Alavi i orffen. Perthyn i bob un ei lif a’i symud; llif yn symud ni trwy anobaith i obaith, trwy amheuaeth i ffydd. Trafod; dysgu; cymdeithasu.
Y GYMDEITHAS
Cymdeithas Ddiwylliannol Eglwys Minny Street: Emlyn Davies yn cyflwyno 'Hanes Dau Gymro': Coch Bach y Bala a Cochfarf.
Am stori ddifyr a noson dda!
Diolch i Emlyn ac i bawb a fu ynglŷn a threfnu a chynnal y cyfarfod
EGLWYS LLANFAIR, PENRHYS
Eglwys Minny Street yn derbyn ymweliad gan gwmni o ffyddloniaid Eglwys Llanfair, Penrhys heddiw; derbyn bendith ac arweiniad ganddynt o'r ieuangaf i'r hynaf: dyma eglwys ar waith yn, trwy a gyda'i phobl.
Mawr ddiolch i bawb.
Y SUL
Bore ‘fory am 9:30, ‘Cydio yn ‘Na’’ (Mathew 5:37).
Cynhelir Ysgol Sul.
Edrychwn ymlaen i groesawu atom cyfeillion o Eglwys Llanfair, Penrhys yn ystod y prynhawn. Diolch am bob cymorth.
Liw nos am 18:00 (Z), ‘Gollwng y Gofynod’ (Salm 4:6).
Dewch/ymunwch â chroeso
CERDDED A TEITHIO’R DEML HEDDWCH
Diolch am gwmni'r cerddwyr bore heddiw: camau, cwmni, cymdeithas, coffi Caffi Castan; roedd Awstin yn hollol iawn: Solvitur ambulando. Wedyn ymlaen i'r Deml Heddwch; diolch i Craig Owen am ein tywys o gwmpas yr adeilad arwyddocaol hwn; cawsom ragwelediad i weledigaeth yr Arglwydd David Davies o Landinam ac i arwyddocâd pensaernïaeth Percy Edward Thomas. Uchafbwynt oedd cael gweld a throi tudalen y Llyfr Coffa Cymreig, sy'n cynnwys dros 35,000 o enwau o'r rhai a gollodd eu bywyd yn ystod Y Rhyfel Byd Cyntaf.
