YN ANAD UN (13) - ATEB

May 3, 2018 Owain Evans

Hosea 2:15

Tra bod yr adnodau eraill yn sôn am ‘mynydd/mynyddoedd’ mae Hosea yn sôn am ‘dyffryn’.

YN ANAD UN (13)

May 3, 2018 Owain Evans

Pos wythnosol.

Ffordd hawdd a hwyliog i ehangu ein gwybodaeth Feiblaidd.

Daw'r ateb tua 21:00

Pa adnod NAD sydd yn perthyn i’r gweddill, a pham?

MINNY’D (31) Y PERL

May 2, 2018 Owain Evans

‘Minny'd’?

Myfyrdod sydyn syml yw 'Minny'd'.

Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.

'BETHANIA' - POBL YR HEN DESTAMENT

May 1, 2018 Owain Evans

HULDA (1)

2 Brenhinoedd 22: 11-20

Mae hanes trist y deyrnas ranedig yn agor a chloi gyda geiriau gwragedd a geiriau proffwydi. Yn 1 Brenhinoedd 14, aeth gwraig y Brenin Jeroboam i weld y proffwyd Aheia i holi a fyddai ei mab yn gwella o’i salwch. Ymateb Aheia oedd y byddai Duw yn difa’r bychan, a theulu Jeroboam i gyd, yn llwyr ac yn gyfan o’r tir.

Yn 2 Brenhinoedd 22, cawn sôn am bump o negeswyr personol y Brenin Joseia yn cael eu danfon at y broffwydes Hulda i ddeisyf ewyllys Duw. Wrth atgyweirio’r deml yn Jerwsalem, darganfuwyd sgrôl cyfraith Duw. Wedi i’r Archoffeiriad Hilceia ei darllen, aethpwyd â hi yn syth i’r brenin. Wrth iddo yntau wrando ei ysgrifennydd Saffan yn darllen cynnwys y sgrôl sylweddolodd Joseia mor bell oedd brenhinoedd a phobl Jwda wedi crwydro o wir ewyllys Duw ar eu cyfer - a’u bod yn haeddu pa gosb bynnag oedd ganddo yn stôr iddynt.

HULDA (2)

Joel 2: 12-13

Aeth negeswyr ar unwaith at Hulda’r broffwydes i geisio cyngor. Fel y proffwyd Aheia gynt, nid newyddion da oedd gan Hulda i’r genedl. ‘Roedd Duw yn mynd i gosbi Jerwsalem. Oherwydd ei ffyddlondeb i Dduw byddai Joseia yn cael teyrnasu mewn llwyddiant a heddwch; ar ôl ei farw byddai yna ddifrod a melltith! Ymhen pymtheg mlynedd ar hugain gwireddwyd ei geiriau bob un.

Mae geiriau Hulda yn ddiweddglo addas i saga waedlyd y deyrnas ranedig. Mae Hulda'r broffwydes, er hynny, allan o diwn â’n tuedd i weld a deall gweinidogaeth broffwydol yr Hen Destament fel peth gwrywaidd. ‘Roedd hon yn wraig o awdurdod a dylanwad nodedig. Rhaid ei bod yn adnabyddus ar bob tu yn nheyrnas Jwda. Dyma’r unig esboniad am ymddiriedaeth Brenin yn ei chyngor a’i doethineb.

Beth sydd wedi dod i’r amlwg wrth ystyried a thrafod hanes a phrofiad rhai o bobl yr Hen Destament?
Pwy oedd eich hoff gymeriad a pham?

'YMLAEN': Y SUL A'R WYTHNOS NEWYDD

April 27, 2018 Owain Evans

Ym mis Mai 2013, cyhoeddwyd Adroddiad o Drafodaethau ac Argymhellion Gweithgor Gweinidogaeth Eglwys Minny Street. Y cyntaf o bum flaenoriaeth a nodwyd i waith a chenhadaeth yr eglwys hon oedd Addoliad. Wrth ymfalchïo yn arddull, naws ac ehangder ein haddoliad, teimlai’r Gweithgor bod yna gyfleoedd i gynyddu ymwneud aelodau yn ein hoedfaon. Hyn, nid yn unig er mwyn datblygu "gweinidogaeth yr holl saint", ond hefyd, fel modd i feithrin cynulleidfa a fydd, gobeithio, yn fwy parod i ymgymryd â threfnu ac arwain oedfaon pan fydd, efallai, mwy o alw (e.e. cyfnod di-weinidog). Cytunwyd bod angen meithrin, ymysg ein haelodau, barodrwydd i gynnig gwasanaeth yn hytrach na disgwyl i rywun ofyn. Gwelwyd hefyd gyfleoedd trwy’r fath ymwneud i ennyn ymdeimlad o gyd-weithio ymysg grwpiau o aelodau’r gynulleidfa.

Bellach, mae pob pumed Sul yn y mis yn gyfle i aelodau’r eglwys i drefnu a chynnal yr addoliad. Buddiol a bendithiol yw hyn. Bydd ein Hoedfa Foreol 10:30 dan arweiniad aelodau a chyfeillion Rhiwbeina. Cynhelir Ysgol Sul. Bydd nwyddau Masnach Deg a phaned yn y Festri wedi’r Oedfa.

Bydd yr Oedfa Hwyrol (18:00) yng ngofal y Gymdeithas. Eto, bydd paned a nwyddau Masnach Deg yn y Festri wedi’r Oedfa.

Dyfal bu’r paratoi, a dygn y trefnu i sicrhau fod gan bawb - o’r ieuengaf i’r hynaf - ei le, cyfle a chyfraniad. Pawb a’i waith, a gwaith i bawb wrth gynnal gwasanaeth ac offrymu mawl ac addoliad. Gweddïwn am wenau Duw ar y Sul.

Nos Lun (30/4; 19:00): ‘Genesis’. Awr fach hamddenol yn y festri: defosiwn syml yn arwain at fymryn o waith llaw syml a buddiol.

Nos Fawrth (2/5; 19:30-20:30): ‘Bethania’. Echel ein trafodaeth eleni yw ‘Pobl yr Hen Destament’. Parhawn gyda HULDA (2 Brenhinoedd 22:11-20 a Joel 2:12-13). Darperir nodiadau ‘Bethania’ rhag blaen ar y wefan hon bore dydd Llun.

Babimini bore Gwener (4/5; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin.