MINNY’D (12) HASAN

‘Minny'd’?

Myfyrdod sydyn syml yw 'Minny'd'.

Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.

'YMLAEN': Y SUL A'R WYTHNOS NEWYDD

Bydd Oedfaon y Sul dan arweiniad ein Gweinidog. Mari Fflur fydd yn arwain defosiwn yr ifanc bore Sul (10:30), a thestun gwers yr Ysgol Sul fydd ‘Tyrd i lawr Sacheus!’ (Luc 19:1-10). Yn homili’r bore (Luc 3:15-17,21-22; Salm 150) bydd Owain yn trafod rhinweddau peidio dod i’r Oedfa, Salm sy’n dweud dim a darganfod pwy ydym go iawn!

Bydd y casgliad rhydd at Waith y Genhadaeth fore a nos

Bod yn deilwng o’r alwad a gawsom (Salm 46; Luc 18:9-14 a 2 Thesaloniaid 1:1-4, 11-12) fydd testun pregeth Oedfa nos Sul (18:00). Wedi ein hachub trwy ras, rhaid byw gan ddathlu ac amlygu’r gras a’n hachubodd.

Bydd y gymdeithas yn parhau yn Koinônia: swper blasus a sgwrs ddifyr mewn bwyty Eidalaidd cyfagos.

Bore a Nos Lun: Siopa Masnach Deg (yng nghartref aelod). Bydd bwydydd tymhorol, cardiau Nadolig, crefftau, teganau a llawer mwy ar gael!

Nos Lun (20/11; 19:00-20:30) PIMS

Cymdeithas Ddiwylliannol Eglwys Minny Street, nos Fawrth (21/11; 19:30 yn y Festri): "Bywyd dwy feddyg" yng nghwmni Mererid Evans a Menna Roblin.

Nos Fercher (22/11; 19:30) Cinio Tsieineaidd yn "Hapus Dyrfa" (Happy Gathering) er budd ein helusen, BanglaCymru (angen bod wedi sicrhau tocyn)

Bore Gwener (24/11; 10:00): ‘Llynyddwch’. Paned wrth ymyl llyn llonydd y Rhath. Yn Terra Nova cawn gyfle i drafod, fesul pennod, llyfr Samuel Wells: How then shall we live (Canterbury, 2016). Echel ein trafodaeth fore Gwener fydd Europe (t.43-50).

PWY DDWEDODD? (11) ATEB

Ateb: Duw trwy Jeremeia broffwyd.

Jeremeia 29:11

PWY DDWEDODD? (11)

Pos wythnosol.

Ffordd hawdd a hwyliog i ehangu ein gwybodaeth Feiblaidd.

Daw'r ateb am 17:30.

MINNY’D (11) PLANNU COED

 ‘Minny'd’?

Myfyrdod sydyn syml yw 'Minny'd'.

Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.

'BETHANIA' - POBL YR HEN DESTAMENT (4)

ESEIA

Safodd Eseia ar ei draed, a chododd ei lais yn broffwyd yn yr un flwyddyn y bu farw'r brenin Usseia (Pennod 6; Galwad Eseia): 733CC. Myn yr ysgolheigion mai Lefiad ydoedd yn gwasanaethu yn y Deml, ac a’r sail y ffaith ei fod y perthyn i gylch dethol y llys brenhinol, mai bonheddwr ydoedd. Heb amheuaeth Eseia yw’r gwleidydd craffaf o’r proffwydi.

Ganed dau o feibion i Eseia, a Duw ddewisodd enw i’r naill a’r llall. Enw’r cyntaf anedig oedd Sear-jasub (7:3); enw’n golygu: ‘Bydd gweddill yn dychwelyd’. Dyma enw llawn gobaith; enw a oedd i Ahas Frenin, ŵyr Usseia, yn warant o fuddugoliaeth. Buasai Resin, brenin Syria, a Pheca, brenin Teyrnas y Gogledd: Israel, a’u byddinoedd ynghyd, yn ymosod ar Jwda, Teyrnas y De. Heb amheuaeth buasai’r colledion yn drwm, a naturiol felly, oedd bod calon Ahas a’i bobl wedi cynhyrfu fel prennau coedwig yn ysgwyd o flaen y gwynt (7:2)! Ond, a dyma’r sicrwydd buasai Jwdea’n goroesi’r llanast a’r lladd: ‘Bydd gweddill yn dychwelyd’, a hynny oherwydd bod Duw o’i phlaid, yn sefyll gyda hwy: dyma gyd-destun gwreiddiol yr adnodau cyfarwydd: Am hynny, y mae’r ARGLWYDD ei hun yn rhoi arwydd i chwi: Wele ferch ifanc yn feichiog, a phan esgor ar fab, fe’i geilw’n Immanuel (7:14). Y neges hon yw calon y broffwydoliaeth gyfan.

Ond, dewis ymddiried yn ei grebwyll gwleidyddol ei hun a wnaeth Ahas - gwrthod dyfroedd Siloa, sy’n llifo'n dawel, a chrynu gan ofn o flaen Resin a Pheca: Syria ac Israel (8:6). Fel arwydd i’r bobl, dewisodd Duw'r enw Maher-shalal-has-bas (8:1-4) i ail fab Eseia, hynny yw: ‘Brysia’r ysbail, prysura’r ysglyfaeth’. Ymhlyg yn enw’r ail fab ‘roedd neges galed am ganlyniadau a goblygiadau penderfyniad Ahas a’i gynghorwyr yn Jwda i blygu glin i Syria ac Israel. ‘Roedd gwaeth felly i ddod: brenin Asyria a’i holl ogoniant. Fe lifa trwy Jwda fel dilyw (8:7). Buasai llif Asyria maes o law yn llyncu Resin a Pheca hefyd. ‘Roedd dyddiau tywyll du yn dod, a’r dyddiad tywyll rhain, â Asyria wedi tramwy trwy’r wlad mewn caledi a newyn (8:21) yw cyd-destun gwreiddiol yr adnodau cyfarwydd, cysurlawn: Y bobl oedd yn rhodio mewn tywyllwch a welodd oleuni mawr..(9:2).

Yn ogystal â rhybuddio’r brenhinoedd Jwda: Usseia, Jotham, Ahas ac Heseceia (1:1) o ganlyniadau a goblygiadau eu penderfyniadau gwleidyddol, mae Eseia’n gyson herio’i bobl i fyw’n deilwng o’r safonau moesol a osodwyd yn nod iddynt gan Dduw. Camgymeriad dybryd, meddai Eseia, yw codi gobeithion cenedl ar sylfaen cyfaddawd gwleidyddol; gwraidd a chraidd gobaith yw Duw, ac un peth - dim ond un peth - sydd yn bwysig i Dduw: cyfiawnder.

Athrylith Eseia Broffwyd yw cadw cerydd (1:1-39:8) a chysur (40:1-66:24) mewn perffaith gynghanedd. Heb bylu dim a’r fin ei genhadaeth, heb faldodi dim o’i bobl, na’i mwytho, myn Eseia eu cysuro â gweledigaeth o ddyfodol gwell; dyfodol o gymod yn Nuw: Cysurwch, cysurwch fy mhobl...Fe drig y blaidd gyda’r oen, fe orwedd y llewpard gyda’r myn, bydd y llo a’r llew yn cyd-bori, a bachgen bychan yn eu harwain (40:1 a 11:6).

Hyn a ddaw, meddai Eseia, hyn oll a ddaw yfory, os ydym, heddiw, yn barod i dalu’r pris amdano, a hynny’n llawn. Erys yr angen am gysur a cherydd Eseia.

PENODAU ac ADNOD ALLWEDDOL

Pennod 6, 40 a 53

Chwi, holl gyrrau’r ddaear, edrychwch ataf i’ch gwaredu, canys myfi wyf Dduw, ac nid oes arall (45:22).

Pwyntiau trafod:

1. Mae gofyn cwestiynau mawr yn bwysicach na bod mewn ffordd i ateb rhai bach.

2. Glynu wrth yr hen yw temtasiwn barod crefyddwyr o hyd.

3. Gwell gennym ddarllen am broffwydi na chael un yn ein plith.

'YMLAEN': Y SUL A'R WYTHNOS NEWYDD

Edrychwn ymlaen at yr Oedfa Foreol Gynnar (12/11 am 9:30 yn y Festri). Bydd ein Gweinidog yn esbonio’r cysylltiad rhwng Martin Luther, hen drên, cadair siglo a phatrwm lliwgar a rhyfedd!

Gweinir brecwast bach a nwyddau Masnach Deg yn y Festri rhwng y ddwy Oedfa Foreol.

Martin Luther (1483-1546); William Williams, Pantycelyn (1717- 1791), Vincent van Gogh (1853-1890); Paul Tillich (1886-1965) a’r Rag’n’bone Man (Rory Charles Graham; gan. 1985) - fe ddônt, bob un, i’r Oedfa Foreol (10:30) i’n harwain at ddealltwriaeth ddyfnach a phrofiad ehangach o ryfeddol ras ein Duw. (Salm 46; Hebreaid 12:1-2; Rhufeiniad 5:1-5)

Liw nos (18:00) y trydydd o bum pregeth am Martin Luther a’r Diwygiad Protestannaidd. Trafodir y gwahaniaeth rhwng ‘Diwygiad’ a ‘Reformation’ a phwysigrwydd yr hyn sy’n digwydd tua phob 500 mlynedd. (Salm 98; Effesiaid 4:1-6 a Luc 5:33-39)

Bydd ein Diaconiaid yn cwrdd nos Lun. Gofynnwn am arweiniad Duw wrth edrych a threfnu i’r dyfodol.

Nos Fawrth (14/11; 19:30-20:30): ‘Bethania’. Echel ein trafodaeth eleni yw ‘Pobl yr Hen Destament’. Eseia fydd testun ein sylw y tro hwn. Darperir nodiadau ‘Bethania’ rhag blaen ar y wefan hon bore dydd Llun.

Babimini bore Gwener (17/11; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.

PWY DDWEDODD? (10) ATEB

Ateb: Y Salmydd

Salm 130:1