PWY DDWEDODD? (8)

Pos wythnosol.

Ffordd hawdd a hwyliog i ehangu ein gwybodaeth Feiblaidd.

Daw'r ateb am 17:30.

MINNY’D (8) TREIGLADAU

‘Minny'd’?

Myfyrdod sydyn syml yw 'Minny'd'.

Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.

'BETHANIA' - POBL YR HEN DESTAMENT (3)

REBECA

Genesis 24: 1, 4, 10-11, 17 a 27: 1-2, 5, 42, 43, 45

Mi hoffwn droi’r stori hon yn ddrama ag iddi dair act:

Act 1: Min nos, merch ifanc hardd, stên wag ar ei hysgwydd yn cerdded yr hen lwybr i’r ffynnon. Nid ar ei phen ei hun mohoni. Gwragedd eraill, hen ac ifanc yn siarad a chwerthin, yn hel newyddion y dydd. Mae dieithryn wrth y ffynnon, deg o gamelod ganddo. Wrth i’r ferch ifanc lenwi’r stên, brysiodd y dieithryn ati a holodd am ddŵr ganddi. Fe gafodd ddŵr, a chododd beth i’w gamelod hefyd. ‘Roedd gwas Abraham wrth ei fodd. ‘Roedd Duw wedi ateb ei weddi. Dyma’r arwydd iddo, darpar wraig Isaac fyddai’r un i dynnu dŵr o’r ffynnon a’i gynnig iddo ac i’w gamelod hefyd. Rebeca oedd ei henw.

Act 2: Rebeca yn hydref ei bywyd. Wedi hir aros, ganed efeilliaid, Jacob ac Esau. Esau, y cyntaf-anedig, cryf ac eofn, ffefryn Isaac. Jacob, tawel, bob amser wrth ochr ei fam. A haul y dydd yn prysur fachlud, galwodd Isaac am Esau; ’roedd i dderbyn bendith ei dad. Aeth Rebeca ati i gynllwynio gweithred ddofn a thywyll. Rhaid i Jacob nid Esau dderbyn bendith Isaac cyn iddo farw. Gyda chymysgedd o gawl carw, croen gafr, dychymyg a phenderfyniad diwyro ei fam, cipiodd Jacob fendith ei dad oddi ar Esau. Pan ddychwelodd Esau a deall iddo gael ei dwyllo penderfynodd ladd Jacob. Clywodd Rebeca ei fygythion. ’Roedd y twyll a’r cynllwynio yn mynd i gosti’n ddrud iddi. ’Roedd rhaid iddi ollwng gafael ar Jacob, yr un a garai yn fwy na neb. Galwodd amdano a’i rybuddio; mewn dychryn a braw ffarweliodd yntau â’i fam.

Act 3: Nifer o flynyddoedd ers i Jacob adael. Rebeca yn byw gyda mab, na allodd anghofio rhan ei fam yn ei dwyllo o’i etifeddiaeth, a gŵr a gollodd, yn naturiol ddigon, ddogn o’r ffydd oedd ganddo ynddi a’r cariad oedd ganddo tuag ati. Ni welodd Rebeca Jacob byth eto.

JACOB

Genesis 28: 10-15

Mae Jacob yn wynebu ar ei noson gyntaf oddi cartref, heb gysgod aelwyd na rhieni. Gwely anghysurus iawn a gafodd, ond llwyddodd i gysgu. Yn ei gwsg cafodd freuddwyd: ysgol yn cydio’r ddaear wrth y nef, a Duw ei hun yn sefyll ar frig yr ysgol yn llefaru wrtho. Disgwyliwn ar i Dduw ei geryddu’n llym am ei holl driciau budr; nid cerydd ond cysur a roddwyd i Jacob - "Wele, yr wyf fi gyda thi." Rhyfedd amynedd yr Arglwydd Dduw!

• Beth yw eich barn am y ddau osodiad o eiddo Jean-Paul Satre: Lle mae pobl mae uffern; ac Uffern yw pobl eraill?
• Yn sgil profiad Rebeca a Jacob, trafodwch eiriau Idwal Lloyd:

Yn fy nghryfder mae fy ngwendid

Yn fy ngwendid mae fy nerth,

Yn fy nghyfoeth mae fy nhlodi,

Yn fy nhlodi mae fy ngwerth.

• Beth, ym marn y grŵp yw gwir edifeirwch?

'YMLAEN': Y SUL A'R WYTHNOS NEWYDD

Dros y Sul, ein braint fel eglwys fydd cael gwrando cenadwri a derbyn arweiniad gan y Parchedig Guto Prys ap Gwynfor (Llandysul). Gwyddom y cawn ganddo bregethu meddylgar a phregethau buddiol a bendithlawn. Gweddïwn am wenau Duw ar Oedfaon y Sul. Yn ôl ein harfer, bydd yr Oedfa Foreol am 10:30. Cynhelir yr Ysgol Sul, a bydd ein plant a phlantos yn ymdrin â hanes Iesu’n dewis disgyblion (Mathew 4:18-22). Parhawn i barchu gorchymyn Iesu, Portha fy ŵyn, a’n llafur yn ddiarbed i hyfforddi ein plant a phobl ifanc. Bydd yr Oedfa Hwyrol am 18:00.

PIMS nos Lun (23/10). Bydd y PIMSwyr hŷn (Blynyddoedd 10-13) yn ymweld â’r Boiler House Graffiti Project (18:30-20:00). Bydd y cwmni iau (Blynyddoedd 7-9) yn cwrdd yn y festri fel arfer (19:00-20:30)

Taith Gerdded Parc y Rhath bore Mawrth (24/10; 10:30-12:30). Manylion llawn yng nghyhoeddiadau’r Sul.

Nos Fawrth (24/10; 19:30-20:30): ‘Bethania’. Echel ein trafodaeth eleni yw ‘Pobl yr Hen Destament’. Testun ein sylw y tro hwn fydd Rebeca a Jacob. Darperir nodiadau ‘Bethania’ rhag blaen ar y wefan hon bore dydd Llun.

PWY DDWEDODD? (7) ATEB

Ateb: Saul i’w weision

1 Samuel 28:7

PWY DDWEDODD? (7)

Pos wythnosol.

Ffordd hawdd a hwyliog i ehangu ein gwybodaeth Feiblaidd.

Daw'r ateb am 17:30.

MINNY’D (7) PEIDIWCH

‘Minny'd’?

Myfyrdod sydyn syml yw 'Minny'd'.

Er mai dim ond munud sydd angen i'w ddarllen, mawr obeithiwn y bydd y neges yn aros gyda chi yn hirach o dipyn.

'YMLAEN': Y SUL A'R WYTHNOS NEWYDD

Oedfa Foreol am 10:30. Testun sylw’r Ysgol Sul fydd y Briodas yn Nghana (Ioan 2:1-12). Lle fydd Iesu’n cuddio tybed? Yn ei homili bydd ein Gweinidog yn ein hannog i oeri’r meddwl a chaniatáu i’r galon grwydro!

Liw nos (Oedfa Hwyrol, 18:00) dychwelwn i Ynys Enlli, ac i fedd Griffith Pritchard. Cofio ‘Pen Calfaria’ fydd y nod.

Bydd y gymdeithas yn parhau yn Koinônia: swper blasus a sgwrs ddifyr mewn bwyty Eidalaidd cyfagos.

Nos Lun (16/10; 19:30): ‘Genesis’. Awr fach hamddenol yn y festri: defosiwn syml yn arwain at fymryn o waith llaw syml a buddiol. Testun y ‘Genesis ‘ hwn fydd Martin Luther a'r Diwygiad Protestannaidd.

Cymdeithas Ddiwylliannol Eglwys Minny Street, (17/10; 19:30 yn y Festri) fydd noson yng nghwmni Elen Elis: ‘Fy ngwaith gyda’r Eisteddfod’.

Babimini bore Gwener (22/10; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.